काठमाडौँ । राष्ट्रपति रामचन्द्र पौडेलले आइतबार छाउनीस्थित राष्ट्रिय सङ्ग्रहालय तथा नेपाली सेनाको सैनिक सङ्ग्रहालयको अवलोकन गरेका छन्। राष्ट्रपति पौडेलसँगै प्रथम महिला सबिता पौडेल पनि सहभागी थिइन्।
राष्ट्रपति पौडेललाई पुरातत्त्व विभागका महानिर्देशक सौभाग्य प्रधानाङ्ग, राष्ट्रिय सङ्ग्रहालय प्रमुख अरुणा नकर्मी तथा राष्ट्रिय मुद्रा सङ्ग्रहालयकी प्रमुख मायादेवी अर्याल लगायतका पदाधिकारीहरूले स्वागत गरे।
सैनिक सङ्ग्रहालय पुग्दा नेपाली सेनाका बलाधिकृत निर्मलकुमार थापाले स्वागत गरेका थिए। साथै, सङ्ग्रहालय प्रमुख सेनानी गेलान लामाले राष्ट्रपति पौडेललाई सैनिक सङ्ग्रहालयको संरचना, सामग्री र महत्वबारे विस्तृत जानकारी दिए।
त्यस्तै, राष्ट्रिय सङ्ग्रहालयका प्रमुख नकर्मीले पनि सङ्ग्रहालयका ऐतिहासिक सामग्री र प्रदर्शनीका बारेमा जानकारी गराएकी थिइन्।
राष्ट्रपति पौडेलको यस अवलोकनले राष्ट्रिय सम्पदा संरक्षण र संग्रहालयको विकासमा सकारात्मक सन्देश जाने विश्वास गरिएको छ।
