काठमाडौँ, बडादसैँको तेस्रो दिन आज पनि मान्यजन तथा ज्येष्ठ आफन्तको हातबाट टीका, जमरा र प्रसाद ग्रहण गरी आशीर्वाद लिने क्रम जारी छ। विजयादशमीका दिनदेखि सुरु भएको टीका थाप्ने परम्परा कोजाग्रत पूर्णिमासम्म चल्नेछ।
विजयादशमीका दिन वा त्यसपछिका दिनमा मान्यजनकहाँ पुग्न नसकेका परिवारका सदस्य तथा आफन्तहरू आज पनि टीका थाप्न जाने गरेका छन्। यस क्रममा परिवारका सदस्य तथा आफन्तबीच टीका, जमरा र प्रसाद आदानप्रदान गर्दै आपसी सम्बन्धलाई थप सुमधुर बनाउने र दसैँको खुसी साटासाट गर्ने गरिन्छ।
दसैँमा निधारमा लगाइने टीका अबिर, दही र अक्षता मिसाएर तयार गरिन्छ। टीकालाई विजय, शुभता र समृद्धिको प्रतीकका रूपमा लिने गरिन्छ। घटस्थापनाका दिन जमरा राखेर उमारिएको जौ तथा अन्य अन्नका बिरुवालाई पनि दसैँमा विशेष महत्त्वका साथ ग्रहण गर्ने परम्परा छ। त्यस्तै, नवदुर्गालाई अर्पण गरिएको प्रसादलाई पवित्र मानी ग्रहण गर्ने चलन छ।
यसैबीच, दसैँ मनाउन सर्वसाधारण आफ्नो गृहजिल्ला तथा गाउँ फर्किएपछि केही दिन सुनसान देखिएको राजधानी काठमाडौँमा चहलपहल बढ्न थालेको छ। टीका थाप्ने, आफन्तसँग भेटघाट गर्ने र दसैँ मनाएर राजधानी फर्किने क्रमसँगै सहरको जनजीवन क्रमशः सामान्य बन्दै गएको छ।
