काठमाडौँ– बलिउड अभिनेता अक्षय कुमार फिल्म ‘हाउसफुल ५’ को सुटिङका क्रममा घाइते भएका छन् । उनी एक्सन सिक्वेन्सको सुटिङका क्रममा सेटमा केही वस्तु उचालिएर घाइते भएको भारतीय मिडियाले उल्लेख गरेका छन् ।
हिन्दुस्तान टाइम्सका अनुसार आँखामा चोट लागेपछि तुरुन्तै फिल्मको सेटमा आँखा विशेषज्ञलाई बोलाइएको थियो। अक्षयको आँखा जाँच गरेपछि डाक्टरले पट्टी लगाइदिएका थिए ।
उनले अक्षयलाई केही दिन सुटिङ नगर्न र आराम गर्न सल्लाह दिएका छन् । मार्च २०२३ मा पनि फिल्म ‘बडे मियाँ छोटे मियाँ’ को सुटिङको क्रममा स्कटल्याण्डमा एक एक्सन दृश्य शूट गर्ने क्रममा अक्षय घाइते भएका थिए ।
अहिले चलचित्रको छायांकन अन्तिम चरणमा पुगेको छ । अक्षयको चोटका कारण फिल्मको सुटिङ केही समयका लागि रोकिएको थियो । त्यसपछि फेरि सुटिङ सुरु भयो । तर, अक्षयको दृश्यको सुटिङ अहिलेका लागि रोकिएको छ । उनको निको भए पछि मात्रै उनका दृश्यहरुको सुटिङ हुनेछ ।
अक्षय कुमारसँगै हाउसफुल ५ मा रितेश देशमुख, अभिषेक बच्चन, श्रेयस तलपदे, चंकी पाण्डे, ज्याकलिन फर्नान्डिज, नरगिस फाखरी, फरदीन खान लगायतका कलाकारहरु छन् ।
यो चलचित्रलाई तरुण मनसुखानीले निर्देशन गर्दैछन् । फिल्म ६ जुन २०२५ मा फिल्म घरमा रिलिज हुनेछ।
