मुम्बई आक्रमणका अभियुक्त एवं अण्डरवल्र्ड डन दाउद इब्राहिम यतिबेला अस्पताल भर्ना भएका छन् । भारतीय मिडियाका अनुसार, दाउदलाई पाकिस्तानमा विष दिइएको आशंका गरिएको छ । दाउदको अहिले पाकिस्तानको कराँचीस्थित अस्पतालमा उपचार भइरहेको दाबी गरिएको छ । यद्यपि, यसबारे आधिकारिक पुष्टि भएको छैन । न त दाउदको अवस्था कस्तो छ भन्ने बारे कुनै औपचारिक जानकारी नै बाहिरिएको छ ।
तथापी दाउदलाई अस्पतालमा कडा सुरक्षाबीच राखिएको भारतीय मिडियाहरुले दाबी गरेका छन् । मिडिया रिपोर्टका अनुसार, नेसनल इन्भेस्टिगेसन एजेन्सी अर्थात् एन.आई.ए.लाई दाउद कराँचीमा रहेको जानकारी दिइएको थियो । त्यसपछि विष दिएको भनिएको घटनाको उद्देश्यबारे विभिन्न अड्कलबाजीहरु शुरु भइरहेका छन् ।
यसमा सत्ता संघर्षदेखि भारतविरोधी गतिविधिमा संलग्न व्यक्तिविरुद्ध कारबाही गर्न पाकिस्तानमाथि बाहिरी दबाबसम्म रहेको अनुमान गरिएको छ । यसअघि पाकिस्तानमा लश्कर–ए–तोयबा कमाण्डर अदनान अहमद उर्फ अबू हन्जलासहित भारतले आतंकवादी मान्ने केही व्यक्ति मारिएका थिए ।
को हुन् दाउद ईब्राहिम ?
डी कम्पनीका दाउद इब्राहिम, भारतका भगौडा हुन् । उनी सन् १९९३ मा मुम्बईमा भएको बम विस्फोटका आरोपी हुन् । मुम्बईमा भएको श्रृङ्खलाबद्ध आक्रमणमा २ सय ५० भन्दा धेरै मानिसको मृत्यु भएको थियो । उक्त घटनामा हजारौँ मानिस घाइते भएका थिए । घटनापछि भारत र अमेरिकाले उनलाई आतंकवादी घोषणा गरेको थियो ।
उनको टाउकोको मूल्य २ करोड ५० लाख अमेरिकी डलर तोकिएको थियो । त्यसयता दाउदलाई पाकिस्तानले शरण दिएको भारतीय संचारमाध्यमहरुले दाबी गर्दै आएका छन् । दाउद माथि अनगिन्ती हत्याको अभियोग, जर्बजस्ती असुली, लागुऔषध ओसारपसार र आतंकवाद लगायतका आरोपहरु छन् । कुनैबेला दाउदको नाम सुन्नासाथ भारतको चलचित्र उद्योग बलिउड समेत काप्ने गर्दथ्र्याे ।
दाउदले भनेका व्यक्तिलाई बलिउडमा स्थान नदिए त्यस्ता निर्माता र निर्देशलाई हत्याको धम्कीसम्म आउने गरेको थियो । सञ्जय दत्त, सलमान खान र अनिल कपुरजस्ता बलिउड अभिनेता दाउद इब्राहिम निकट थिए भनेरसमाचारहरु प्रकाशित भएका थिए । नेपालमा पनि बेलाबेलामा नक्कली भारतीय रुपैयाँको कारोबार लगायतका प्रकरणहरुमा दाउदको नाम जोडिने गरेको छ ।
