इलाम। इलाम नगरपालिका–९ भाङटार र वडा नं. ११ सोयाक जोड्ने पुवाखोलामा बेलिब्रिज जडान सुरु गरिएको छ। २३० फिट लामो र १४ फिट चौडा पुल दुई साताभित्र जडान सम्पन्न गरी सञ्चालनमा ल्याउने तयारी गरिएको छ।
सङ्घीय सरकारको रु. २ करोड २० लाख ३४ हजार २३१ लागतमा बेलिब्रिज जडान सुरु गरिएको सडक डिभिजन कार्यालय, इलामले जनाएको छ। कार्यालयका प्राविधिक अर्जुन घिमिरेका अनुसार पुल जडानका लागि भारतबाट प्राविधिक टोलीसमेत नेपाल आएको छ।
पुलका लागि आवश्यक सिभिल संरचना गत आर्थिक वर्षमै निर्माण भइसकेको थियो। भारत सरकारको अनुदान सहयोगमा नेपालले प्राप्त गरेको बेलिब्रिज जडानको काम सुरु भएपछि स्थानीयवासी उत्साहित भएका छन्।
पुल सञ्चालनमा आएपछि उक्त सडक मेची राजमार्गको वैकल्पिक मार्गका रूपमा प्रयोग गर्न सकिने स्थानीय प्रकाश नेपालले बताए। उनका अनुसार वर्षायाममा मेची राजमार्गमा यातायात प्रभावित हुँदा यो सडकले वैकल्पिक मार्गका रूपमा महत्वपूर्ण भूमिका खेल्न सक्छ।
बेलिब्रिज निर्माण सम्पन्न भएपछि झापा, इलाम, पाँचथर, ताप्लेजुङ र तेह्रथुमका केही क्षेत्रमा वर्षायाममा समेत यातायात आवागमन सहज र नियमित हुने अपेक्षा गरिएको छ।
मेची राजमार्गको वैकल्पिक सडकका रूपमा लिइएको उक्त मार्ग इलामदेखि बिर्तामोडसम्म करिब ५० किलोमिटर लामो छ। इलाम खण्डअन्तर्गत माई नगरपालिका क्षेत्रमा १५ किलोमिटर सडक कालोपत्रे भइसकेको छ।
बाँकी १७ किलोमिटरमध्ये १४ किलोमिटर सडक निर्माणाधीन अवस्थामा रहेको सडक डिभिजन कार्यालयले जनाएको छ।
