काठमाडौं । भोटेकोशी हुँदै त्रिशूली नदीमा आएको बाढीले धादिङको कृष्णभिर र परेवाभिर क्षेत्रमा सडक कटान गरेपछि पृथ्वी राजमार्ग पूर्ण रूपमा अवरुद्ध भएको छ। राजमार्ग बन्द भएसँगै काठमाडौं–हेटौँडा जोड्ने वैकल्पिक मार्ग कान्ति राजमार्गमा सवारीसाधनको चाप अत्यधिक बढेको छ।
पृथ्वी राजमार्ग अवरुद्ध भएपछि साना तथा मझौला सवारीसाधन वैकल्पिक रूपमा कान्ति राजमार्गतर्फ मोडिएका छन्। हेटौँडाबाट मकवानपुरगढी, टिकाभैरव हुँदै ललितपुरको एकान्तकुना जोड्ने सडकमा सवारीसाधनको लामो लाइन लागेको छ।
कृष्णभिर र परेवाभिर क्षेत्रमा त्रिशूली नदीले सडकको जग कटान गर्नुका साथै पहिरो खसेपछि पृथ्वी राजमार्गमा यातायात सेवा ठप्प भएको हो। सडक मर्मतका लागि प्राविधिक टोली परिचालन गरिए पनि तत्काल राजमार्ग सञ्चालनमा आउने सम्भावना न्यून रहेको जनाइएको छ।
सडक विभागले कान्ति राजमार्गसँगै त्रिभुवन राजपथ, बीपी राजमार्ग तथा हेटौँडा–कुलेखानी–फर्पिङ सडकलाई पनि वैकल्पिक मार्गका रूपमा प्रयोग गर्न आग्रह गरेको छ।
वैकल्पिक सडकमा सवारी चाप बढेकाले यात्रु तथा चालकलाई संयमित भएर यात्रा गर्न विभागले आग्रह गरेको छ। वर्षाका कारण विभिन्न सडकखण्डमा पहिरोको जोखिम रहेकाले यात्रा गर्नुअघि सम्बन्धित सडक निकाय तथा ट्राफिक प्रहरीबाट सडकको अवस्थाबारे जानकारी लिनसमेत विभागले अनुरोध गरेको छ।
