अमेरिकी राष्ट्रपति डोनाल्ड ट्रम्पले सामूहिक निर्वासन अभियान सुरुगरेसँगै अमेरिकामा रहेका सयौँ आप्रवासीलाई पक्राउ गरिएको र केहीलाई सैनिक विमानमार्फत देश बाहिर लगिएको ह्वाइट हाउसले जनाएको छ । अमेरिकाबाट सार्वजनिक भिडियो अनुसारमा अवैध आप्रवासीहरूलाई हातमा हत्कडी र खुट्टामा नेल बाँधेर देश निकाला गरिएको छ । ट्रम्पको यस्तो एक्सन सँगै अमेरिकामा रहेका नेपाली अबैध आप्रवासीहरुपनि मारमा परेका छन् ।
अमेरिकी राष्ट्रपतिको सपथ लिएसँगै डोनाल्ड ट्रम्पले मानव–तस्करलाई लाखौँ रकम बुझाएर अमेरिका पुगेका ‘अवैध आप्रवासी’हरूलाई धमाधम आ–आफ्नो देश फर्काउन थालेका छन् । केहि दिन अघि मात्र छिमेकी देश भारतका १ सय ५ जना आप्रवासीहरूलाई अमेरिकाले विमानमा राखेर फिर्ता ग¥यो । अमेरिकी सैन्य विमानमा सवार ‘अवैध आप्रवासी’हरूको हातमा हत्कडी र खुट्टामा नेल बाँधिएको थियो । विमानमा सवार गर्भवती महिला र बालबालिका बाहेक सबै आप्रवासीहरूलाई ‘अपराधीको जस्तै व्यवहार गरिएको थियो ।
यस्ता दृश्यबाटै प्रष्ट हुन्छ कि अमेरिकामा अवैध रुपमा बसिरहेका आप्रवासीको दिनगन्ति सुरु भइसकेको छ । राष्ट्रपति ट्रम्पको अवैध आप्रवासीलाई आफ्नै देश फिर्ता पठाउने नीतिअनुसार झण्डै १ हजार ३ सय ६५ अवैध नेपाली पनि ट्रम्प प्रशासनको निगरानीमा छन् । पहिलो लटमा ती नेपालीहरूलाई अमेरिकाबाट चाडै निष्कासन गरिने छ । उनीहरू कुनै पनि बेला समातिएर नेपाल पठाइन सक्छन् ।
दोस्रो लटमाचाहिँ आप्रवासन सम्बन्धी मुद्दा खेपिरहेका नेपालीहरू पर्छन् ।
यस्ता नेपालीको संख्या ४ सयको हाराहारीमा रहेको अनुमान गरिएको छ । तेस्रो लटमा भने आगामी जुन ३० मा टीपीएस सकिने नेपालीहरू पर्छन् । यस प्रकारका नेपालीहरूको संख्याचाहिँ अब करिव ५ हजार हाराहारीको छ । त्यसपछिको लटमा ग्रीन कार्डको म्याद सकिनेहरू, विद्यार्थी भिसा थप्न समस्यामा पर्नेहरू पर्छन् । कुरा त्यतिमा मात्र सीमित छैन, अंगिकृत नागरिक बनेकाको फाइल पनि हेर्न सकिने भनिएको छ । यदि त्यसो गरियो भने नक्कली कागजात भेटिनेलाई थप प्रक्रियामा लगेर फिर्ता पठाइने भनिएको छ । यसो गर्दा नक्कली कागजात जुटाएका धेरै एक्स्ट्रा अर्डिनरी र एसाइलीहरूको रुवाबासी नै हुन्छ ।
ट्रम्पको उदयले नेपालीहरूलाई थप त्रास थपिरहेको छ । नेपालमा अहिले एकदमै चासो छ– ट्रम्पले कति नेपालीलाई देश निकाला गर्लान् ? कुनकुन राज्यमा बस्नेहरू सबैभन्दा समातिएलान ? जानकारहरुका अनुसार १ हजार ३ सय ६५ अवैध नेपाली त पक्का देश फर्काइन्छन् नै । तर संख्या योभन्दा धेरै हुनेछ ।
अर्को कुरा अवैध रूपमा अमेरिका जान हिँडेका सयौँ नेपालीहरू दुबईदेखि ब्राजिल हुँदै मेक्सिकोसम्म अलपत्र छन् । यो संख्याले थप विचलित बनाइरहेको छ । भर्खंरै अमेरिका पुगेका नेपाली र उनको परिवार थप चिन्तामा छ । यस्ता धेरै दुःखदायी दिनहरू भोग्नै बाँकी छ अमेरिकी नेपालीहरूले । विगत एक दशकमा अमेरिका गएका ७ हजार १ सय ४३ नेपाली अमेरिकामै लुकेको एक आधिकारिक तथ्यांक सार्वजनिक भएको छ । अमेरिकाको डिपार्टमेन्ट अफ होमल्याण्ड सेक्युरिटीका अनुसार सन २०१४ देखि २०२३ सम्म ओभर स्टे भएका ९ हजार ३२ नेपालीमध्ये १ हजार ८ सय ८९ ओभर स्टे भएर फर्के पनि ७ हजार १ सय ४३ भने अमेरिकामै लुकेका छन् ।
नेपालीहरूको यो संख्या भिजिट भिसामा माथिल्लो बाटोबाट अमेरिका पुगेका र निर्धारित समयमा नेपाल नफर्केर लुक्नेहरूको हो । यो संख्यामा मानव तस्करहरूले तल्लो बाटोबाट अमेरिका पुर्याएका हजारौं नेपालीहरूको संख्या जोडिएको छैन । यसरी अमेरिकामा लुकेका धेरै नेपालीहरूले शरणका लागि आवेदन दिएको छन् । कतिपय नेपालीले शरणको प्रक्रियाबाट अमेरिकी कागजात पनि प्राप्त गरिसकेका छन् । केही त ग्रीन कार्ड हुँदै अमेरिकी नागरिक भएर नोभेम्बर ५ को चुनावमा मतदान पनि गरिसकेका छन् । अमेरिकामा लुकेर बस्नेहरूको संख्या हेर्दा– नेपाल अझै डेन्जर जोनमा भने पुगिसकेको छैन ।
