काठमाडौं । हमासको नियन्त्रणमा रहेका नेपाली विद्यार्थी विपिन जोशी जीवितै रहेको इजरायली सञ्चारमाध्यम टाइम्स अफ इजरायलले बताएको छ ।
टाइम्स अफ इजरायलले गाजामा बन्धक बनाइएकामा एक नेपालीसहित एक तान्जेनियाली र ६ जना थाई नागरिक जीवित रहेको उल्लेख गरेको छ । हमासले लागेका आठ थाई नागरिक मध्ये २ जनाको मृत्यु भएको इजरायली सेनाले बताएको रिपोर्टमा उल्लेख छ ।
मिडिया रिपोर्टमा आज तीन इजरायली र पाँच थाई नागरिक रिहा हुदै छन् । रिहा हुने इजरायली नागरिकमा २० वर्षीया अगाम बर्गर, २९ वर्षीया अर्बेल यहूद र ८० वर्षीय गादी मोसे मोजेस छन् भने पाँच थाई नागरिकको नाम खुलाइएको छैन ।
दुवै पक्षबीच भएको सहमति अनुसार आउँदो शनिबार हमासले पुनः तीन इजरायली बन्धकलाई रिहा गर्नेछ ।
हमासले रिहा हुने बन्धकको सूची मध्यस्थतकर्तालाई बुझाएको र इजरायलले समेत त्यसमा सहमति जनाएको टाइम्स अफ इजरायलले जनाएको छ । तीन बन्धक रिहाइको बदलामा आज इजरायलले ११० प्यालेस्टिनी बन्दीलाई रिहा गर्नेछ।
सन् २०२३ अक्टोबर ७ मा हमासले अप्रत्याशित रूपमा इजरायलमा आक्रमण गरी २५१ जनालाई बन्धक बनाएर गाजातर्फ लगेको थियो । नेपाली विद्यार्थी विपिनलाई पनि उनीहरुले लागेका थिए ।
इजरायल र हमासबीच युद्धविराम भएर बन्धक छुटिरहेकाले विपिन पनि अब छिटै छुट्न सक्ने अनुमान गरिएको छ तर उनी कहिलेसम्म छुट्छन भन्ने स्पष्ट जानकारी छैन ।
पछिल्लो युद्धविरामपछि हमासले पहिलो चरणमा दुई पटक गरी ७ बन्धकलाई रिहा गरिसकेको छ भने इजरायलले २९० प्यालेस्टाइनीलाई जेलबाट रिहा गरेको छ ।
