मनाङ, गण्डकी प्रदेशका मुख्यमन्त्री सुरेन्द्रराज पाण्डेले मनाङमा तत्काल अत्यावश्यक काम गर्ने बताउनुभएको छ ।
बाढीपहिरोबाट प्रभावित मनाङ जिल्लाको स्थलगत निरीक्षण गरी प्रभावित नागरिकको अवस्था, क्षति र तत्काल गर्नुपर्ने कामबारे जानकारी दिने क्रममा उहाँले सो धारणा राख्नुभएको हो ।
चामे पुग्नुभएका मुख्यमन्त्री पाण्डेले बाढीपहिरोका कारण अवरुद्ध सडक, पुल, खानेपानी तथा अन्य पूर्वाधार शीघ्र सञ्चालनमा ल्याउने र प्रभावित नागरिकको जनजीवन सामान्य बनाउन आवश्यक कार्य तत्काल अघि बढाइने बताउनुभयो ।
केही दिनअघि ठाडो र लमजुङ हिमालको बेसक्याम्पबाट बग्ने घट्टेखोलामा आएको बाढीपहिरोले मस्र्याङ्दी नदी थुनिएपछि त्रसित स्थानीयको गुनासो सुन्नुभएको हो । हाल पानी बगिरहेकाले जोखिम कम देखिएको भए पनि खोलाको बगरमा थुप्रिएको गेग्रान र ठूला ढुङ्गाका कारण घरहरु जोखिममा परेका छन् । पक्की पुल पुरिएको छ ।
स्थानीयसँग प्रत्यक्ष भेटगरी उहाँका समस्या र आवश्यकता सुनेपछि मुख्यमन्त्री पाण्डेले सडक तथा यातायात सञ्चालन, खानेपानी, खाद्यान्न, आवास तथा क्षतिग्रस्त पूर्वाधार पुनर्निर्माणलगायत क्षतिको तथ्याङ्क माग राख्नुभएको छ ।
उहाँले भन्नुभयो, “प्रदेश सरकारले सकेको सहयोग गर्छ । नदी खुलाएर स्थानीयको त्रास हटाउन आवश्यक छ ।”
स्थानीय तह र प्रदेश सरकारको स्रोत तथा क्षमताले तत्काल गर्न सकिने अत्यावश्यक कामलाई प्राथमिकताका साथ अघि बढाउने र प्रदेशको स्रोतबाट सम्भव नहुने ठूला तथा दीर्घकालीन कामका लागि सङ्घीय सरकारसँग समन्वय गरिने मुख्यमन्त्री पाण्डेले बताउनुभयो ।
“अहिलेको प्राथमिकता प्रभावित नागरिकको जीवन सहज बनाउने, अवरुद्ध सडक तथा पूर्वाधार सञ्चालन गर्ने र आवश्यक राहत तथा पुनःस्थापनाको व्यवस्था गर्ने हो”, मुख्यमन्त्री पाण्डेले भन्नुभयो, “प्रदेश, स्थानीय तह, सुरक्षा निकाय र सम्बन्धित कार्यालयबीच समन्वय गरेर तत्काल गर्न सकिने काम अघि बढाउँछौँ र थप आवश्यक सहयोगका लागि सङ्घ सरकारसँग समन्वय गर्छौं ।” चाडपर्वको समय नजिक रहेकाले स्थानीयको दैनिकी सहज बनाउन तत्काल गर्नुपर्ने कामलाई पहिलो प्राथमिकतामा राखिएको उहाँले बताउनुभयो ।
बाढीपहिरोबाट भएको क्षतिको स्थलगत अवस्थाबारे जानकारी लिँदै मुख्यमन्त्री पाण्डेले विपद्का समयमा उद्धार, राहत, उपचार तथा पुनःस्थापनासँगै क्षतिग्रस्त संरचनाको पुनर्निर्माणलाई प्राथमिकतामा राखेर प्रदेश सरकार अघि बढिरहेको बताउनुभयो ।
यसअघि मङ्गलबार मुख्यमन्त्री पाण्डे बागलुङ, म्याग्दी, पर्वत जिल्लाको बाढी पहिरो प्रभावित क्षेत्रको अवलोकन गर्नुभएको थियो । विसं २०७८ जेठ १४ र असार १ गते म्रर्स्याङदीमा आएको बाढीले मनाङमा भौतिक क्षति पुर्याएको थियो ।
