काठमाडौं । महाधिवेशन सम्पन्न भएको एक वर्ष बितिसक्दा पनि नेपाली कांग्रेसको केन्द्रीय समितिले पूर्णता पाएको छैन । कांग्रेसको संसदीय बोर्डले पूर्णता नपाएरै प्रतिनिधिसभा तथा प्रदेशसभा निर्वाचन सकिएको छ । भ्रातृ संस्था र विभागले अझै पूर्णता पाएका छैनन् ।
कांग्रेसको विधानको नियमावलीको २२ को २ मा महाधिवेशन सम्पन्न भएको ३ महिनाभित्र केन्द्रीय समितिले पूर्णता पाइसक्नु पर्ने उल्लेख छ । तर १४ औँ महाधिवेशन सकिएको एक वर्षसम्म समितिले पूर्णता पाएको छैन । कोषाध्यक्षसहित १० केन्द्रीय सदस्य मनोनीत गर्न बाँकी छ ।
महाधिवेशन सकिएको ६ महिनाभित्र नीति अधिवेशन गर्ने भनिएको छ । तर, अहिलेसम्म नीति अधिवेशन भएको छैन । यतिसम्म कि, कांग्रेसले विधानअनुसार गर्नुपर्ने संसदीय बोर्डले पूर्णता नपाएरै प्रतिनिधिसभा तथा प्रदेशसभा निर्वाचन सकिएको छ ।
केन्द्रीय कार्य सम्पादन समिति, भातृ तथा शुभेच्छुक संस्था तथा विभागले अझै पूर्णता पाएका छैनन् । पार्टी पुरानै पद्धतिमा चलेको भन्दै कतिपय केन्द्रीय सदस्यले पार्टी सभापति देउवाप्रति आक्रोश पोखेका छन् ।
१४ औँ महाधिवेशनपछि पार्टी स्थानीय तह, प्रतिनिधिसभा र प्रदेशसभा निर्वाचनमा केन्द्रित हुन परेकाले विधान अनुसार काम गर्न नसकेको संस्थापन पक्षका नेताको तर्क छ ।
पुस २२ गते बस्ने केन्द्रीय कार्यसमितिको बैठकमा नीति महाधिवेशनबारे छलफल हुने कांग्रेसको कार्यसूची छ । महाधिवेशन सकिएको वर्ष दिनसम्म पार्टी विधान अनुसार नचल्दा संगठनात्मक संरचना मात्र कमजोर भएको छैन, पार्टीको आन्तरिक लोकतन्त्रमाथि नै प्रश्न उठेको छ ।
