पोखरा, ११ चैत । नेपाली काँग्रेस गण्डकी प्रदेश संसदीय दलले मुख्यमन्त्री खगराज अधिकारीलाई सरकारको नेतृत्व छाडेर नयाँ सरकार गठनका लागि मार्ग प्रसस्त गरिदिनुहुन् आग्रह गरेको छ ।
नेकपा माओवादी केन्द्रले शुक्रबार गण्डकी प्रदेश सरकालाई दिएको समर्थन फिर्तासँगै सरकार छाडेर बाहिरिएको भोलिपल्ट शनिबार नेपाली काँग्रेस गण्डकी प्रदेश संसदीय दलका नेता सुरेन्द्र पाण्डेले पत्रकार सम्मेलन गरी मुख्यमन्त्री अधिकारीलाई सरकारबाट हटेर नयाँ सरकार गठनका लागि मार्गप्रश्स्त गर्न आग्रह गरेका हुन् ।
गण्डकी प्रदेशमा नेकपा एमाले, माओवादी केन्द्र र राप्रपाको समर्थनमा एमालेका नेता खगराज अधिकारी मुख्यमन्त्री नियुक्त भएका थिए । राष्ट्रपति निर्वाचनमा कांग्रेस, माओवादी, समाजवादीसहितका दलको गठबन्धन बनेपछि गण्डकी प्रदेश सरकार अल्पमतमा परेको छ ।
गण्डकी प्रदेश सरकार अल्पमतमा परेको र बहुमत जुटाउने सम्भावना पनि नभएक भन्दै काँग्रेस नेता पाण्डेले ‘अल्पमतमा परेको र बहुमत जुटाउने सम्भावना पनि नरहेको अवस्थामा जतिसक्दो छिटो मार्गप्रशस्त गर्नुको विकल्प छैन् ।’
पाण्डेले विज्ञप्तिमा भनेका छन्, ‘बहुमत गुमाई सकेर अल्पमतमा परेको कामचलाउ सरकारले आर्थिक दायित्व सिर्जना गर्ने र कर्मचारी नियुक्रि सरुवा बढुवा लगायतको काम गर्नु न्यायसंगत मानिदैन ।’ यसरी गरेका निर्णयबाट भविष्यमा प्रदेशलाई आर्थिक लगायतको दायित्व सिर्जना भए त्यसको दायित्व नयाँ सरकारले लिन बाध्य नहुने पनि पाण्डेले विज्ञप्तिमा उल्लेख गरेका छन् । उनले दूरगामी प्रकृतिका निर्णय नलिन र कार्यान्वयन नगर्न पनि प्रदेश सरकारलाई आग्रह गरेका छन् ।
गण्डकी प्रदेश सभाका ६० जना प्रदेश सभा सदस्यमध्ये २७ जना काँग्रेसका, १३ जना माओवादी, १७ जना एमाले र १ जना स्वतन्त्र रहेका छन् । प्रदेश सभा सदस्यको संख्या हेर्दा पाण्डे मुख्यमन्त्रीका बलिया दाबेदार हुन् भने उनी नेपाली काँग्रेस गण्डकी प्रदेश संसदीय दलका नेता समेत हुन् ।
नेकपा माओवादी केन्द्रबाट गण्डकी प्रदेश सरकारमा सहभागी भौतिक योजना तथा याातायात मन्त्री हरिबहादुर चुमानसहितका दुई मन्त्रीले पार्टी अध्यक्ष एवं प्रधानमन्त्री पुष्पकमल दाहल प्रचण्डको निर्देशनमा शुक्रबार मन्त्रीपदबाट राजीनामा दिएका छन् ।
