काठमाडौं। गृहमन्त्री सुधन गुरुङले मुलुकमा शान्ति सुरक्षा कायम गर्न सरकार पूर्ण रूपमा क्रियाशील रहेको बताएका छन्।
बिहीबार राष्ट्रियसभाको बैठकमा सांसदहरूका जिज्ञासाको जवाफ दिँदै उनले देशमा शान्तिसुरक्षा सुदृढ बनाउन गृहमन्त्रालय सक्रिय रूपमा काम गरिरहेको बताए।
निर्मला पन्त हत्या प्रकरणबारे उठेका प्रश्नको सन्दर्भमा गृहमन्त्री गुरुङले यस्ता संवेदनशील विषयमा सांसदहरूले पनि जिम्मेवारीपूर्वक प्रस्तुत हुनुपर्ने धारणा राखे।
“माननीयज्यूहरूले उठाउनुभएका विषय निकै संवेदनशील छन्। कुनै व्यक्तिको परिवारको सदस्यको निधन हुँदा त्यस विषयलाई बारम्बार सम्झाइरहँदा पीडित परिवारलाई शान्ति मिल्छ?” उनले प्रश्न गरे।
उनले उक्त घटनाको अनुसन्धान अझै जारी रहेकाले सार्वजनिक रूपमा टिप्पणी गर्नु उपयुक्त नहुने बताए। “यस विषयमा सूक्ष्म रूपमा अनुसन्धान भइरहेको छ। प्रतिनिधिसभा र राष्ट्रियसभाका सम्पूर्ण माननीयज्यूहरूलाई यो विषय बारम्बार उठान नगर्न अनुरोध गर्दछु,” उनले भने। आवश्यक परे व्यक्तिगत रूपमा आफूलाई जिज्ञासा राख्न सकिने पनि उनले उल्लेख गरे।
गृहमन्त्री गुरुङले निर्मला पन्त प्रकरणबारे थप टिप्पणी गर्न नचाहेको पनि स्पष्ट पारे।जवाफपछि सांसद विष्णुबहादुर विश्वकर्माले मन्त्रीको अभिव्यक्तिले आफ्नो विधायकीय अधिकारमाथि हस्तक्षेप भएको महसुस भएको बताए। उनले प्रश्न गर्नु सांसदको अधिकार र त्यसको जवाफ दिनु मन्त्रीको संसदीय दायित्व भएको स्मरण गराए।
फरक प्रसङ्गमा गृहमन्त्री गुरुङले मानसिक स्वास्थ्यलाई सरकारले प्राथमिकतामा राखेको उल्लेख गर्दै संघ, प्रदेश र स्थानीय तहबीच समन्वय गरेर योजना अघि बढाइरहेको जानकारी दिए।
“हाम्रो देशले धेरै उतारचढाव बेहोरेको छ। त्यसैले तीनै तहका सरकार मिलेर मानसिक स्वास्थ्यसम्बन्धी योजना बनाइरहेका छौँ। ११६६ हेल्पलाइनमार्फत आत्महत्या रोकथामका लागि पनि प्रयास भइरहेको छ,” उनले भने।
