काठमाडौं । नेपाली कांग्रेसको १५औँ नियमित महाधिवेशन पक्षधर समूहले आज पूर्वपदाधिकारी र निवर्तमान केन्द्रीय सदस्यहरूको छुट्टाछुट्टै बैठक बोलाएको छ।
समूहका अनुसार पूर्वपदाधिकारीहरूको बैठक बिहान ११ बजे र निवर्तमान केन्द्रीय सदस्यहरूको बैठक दिउँसो २ बजे चुनदेवीस्थित सम्पर्क कार्यालयमा बस्नेछ। बैठकमा काठमाडौंमा उपलब्ध पूर्वपदाधिकारी तथा निवर्तमान केन्द्रीय सदस्यहरूको सहभागिता रहने जनाइएको छ।
बैठकको मुख्य एजेन्डा आगामी साउन २९ गते आयोजना हुने राष्ट्रिय भेलाको तयारी रहेको स्रोतले जनाएको छ।
विशेष महाधिवेशनपछि दुई धारमा विभाजित नेपाली कांग्रेसभित्र आन्तरिक एकता कायम गर्ने उद्देश्यले संस्थापन इतर समूहले सभापतिसमक्ष पाँचबुँदे सहमतिको प्रस्ताव अघि सारेको थियो। तर उक्त प्रस्तावलाई बेवास्ता गरिएको आरोप लगाउँदै इतर समूहले राष्ट्रिय भेला आयोजना गर्ने निर्णय गरेको हो।
