काठमाडौं। नेपाल दूरसञ्चार प्राधिकरणले अनलाइन सट्टेबाजी (बेटिङ) तथा अवैधानिक वित्तीय कारोबारमा संलग्न दुई लाखभन्दा बढी वेबसाइट र एप बन्द गरेको जनाएको छ।
सरकारले गत चैत १३ गते जारी गरेको शासकीय सुधारसम्बन्धी १०० कार्यसूची अन्तर्गत सञ्चार तथा सूचना प्रविधि मन्त्रालयलाई सट्टेबाजीसँग सम्बन्धित वेबसाइट तथा एप २४ घण्टाभित्र बन्द गर्ने जिम्मेवारी दिइएको थियो। सोही निर्णयअनुसार नेपालमा सञ्चालित बेटिङ वेबसाइटहरू बन्द गर्ने अभियानलाई तीव्रता दिइएको प्राधिकरणले जनाएको छ।
प्राधिकरणका अनुसार बन्द गरिएका वेबसाइटको स्थानमा नयाँ नाम र नयाँ डोमेनमार्फत पुनः सञ्चालन हुने क्रम जारी रहेकाले निरन्तर अनुगमन र कारबाही भइरहेको छ। यो वर्ष फिफा विश्वकप सुरु भएयता मात्र दुई लाख २३ हजार ५६८ वटा बेटिङ तथा अवैधानिक वित्तीय कारोबारसँग सम्बन्धित वेबसाइट र एपमा पहुँच अवरुद्ध गरिएको छ।
विश्वकपका बेला अनलाइन बेटिङको प्रयोग बढ्न सक्ने आकलनपछि प्रधानमन्त्री तथा मन्त्रिपरिषद्को कार्यालयले समेत यस विषयमा विशेष चासो देखाएको थियो। त्यसपछि प्राधिकरणले कारबाहीलाई थप प्रभावकारी बनाउन छुट्टै टास्क फोर्स गठन गरेको जनाएको छ।
टास्क फोर्समा रहेका दूरसञ्चारका सहायक निर्देशक तथा इन्जिनियर ओमप्रकाश महतोका अनुसार विश्वकप सुरु भएदेखि इन्टरनेट सेवा प्रदायक (आईएसपी)का प्रतिनिधिलाई प्राधिकरणमै परिचालन गरी शंकास्पद वेबसाइटहरू तत्काल ब्लक गर्ने व्यवस्था गरिएको छ।
उहाँका अनुसार अधिकारप्राप्त निकायहरूले पहिचान गरेका बेटिङ साइट तथा अवैधानिक वित्तीय कारोबारमा प्रयोग हुने वेबसाइटहरूको यूआरएल आईएसपीसँगको सहकार्यमा ब्लक गरिन्छ। ठूलो संख्यामा वेबसाइट सञ्चालन हुने भएकाले एक–एक गरेर खोज्न सम्भव नहुने हुँदा प्रविधिको सहायताबाट निगरानी गरिने उहाँले बताउनुभयो।
महतोका अनुसार एउटा वेबसाइट बन्द गरिए पनि नयाँ डोमेनमा अर्को वेबसाइट खुल्ने चुनौती कायम छ। त्यसैले ‘थ्रेट इन्टेलिजेन्स टुल’को प्रयोग गरी निरन्तर निगरानी, खोज तथा ब्लक गर्ने कार्य भइरहेको छ। यसका लागि आवश्यक जनशक्ति पनि परिचालन गरिएको प्राधिकरणले जनाएको छ।
प्राधिकरणले अवैधानिक बेटिङ वा वित्तीय कारोबारसँग सम्बन्धित वेबसाइट वा एपबारे जानकारी भए सम्बन्धित डिजिटल प्लेटफर्ममार्फत सूचना उपलब्ध गराउन सर्वसाधारणलाई आग्रह गरेको छ।
