काठमाडौं । सार्वजनिक सेवा प्रशारण संस्था (पीएसबी) अन्तर्गतको स्याटेलाइट लिंक खरिदमा अनियमितता भएको आशंकामा गठित छानबिन समितिले सोमबार नेपाल टेलिभिजनबाट करिब डेढ दर्जन फाइल नियन्त्रणमा लिएको छ।
उच्च स्रोतका अनुसार रेडियो नेपाल र नेपाल टेलिभिजनलाई गाभेर गठन गरिएको पीएसबीमा स्याटेलाइट लिंक खरिद प्रक्रियामा अनियमितता भएको आशंकापछि गठित समितिले खरिदसँग सम्बन्धित महत्वपूर्ण कागजातहरू संकलन गरेको हो।
नेपाल टेलिभिजनले सन् २००५ देखि थाइल्याण्डको थाइकम पीसीएल (Thaicom PCL) सँग स्याटेलाइट सेवा खरिद गर्दै आएको छ। तर, पीएसबीका तत्कालीन अध्यक्ष डा. महेन्द्र बिष्टको कार्यकालमा गरिएको पछिल्लो स्याटेलाइट लिंक खरिद प्रक्रियामा अनियमितता भएको दाबी स्रोतले गरेको छ।
स्रोतका अनुसार छानबिन समितिले उक्त खरिद प्रक्रियामा डा. बिष्टलाई मुख्य जिम्मेवार ठहर गर्दै कारबाहीको सिफारिससहितको प्रतिवेदन सूचना तथा सञ्चार मन्त्रालयमा बुझाउने तयारी गरेको छ।
सूचना तथा सञ्चार मन्त्रालयले गत जेठ २२ गते इञ्जिनियर डा. आभाष मास्केको संयोजकत्वमा चार सदस्यीय छानबिन समिति गठन गरेको थियो। समितिमा उमेश रुपाखेती, टिकाराम कार्की र नविनकुमार मिश्र सदस्य रहेका छन्।
समितिलाई स्याटेलाइट सेवा खरिद तथा व्यवस्थापनसँग सम्बन्धित विगतका सम्झौता, सेवा विस्तार, प्रविधि रूपान्तरण र उपकरण खरिद प्रक्रियाको अध्ययन गरी आवश्यक सुझावसहित २१ दिनभित्र प्रतिवेदन पेश गर्ने जिम्मेवारी दिइएको थियो।
समितिले प्रतिवेदन अन्तिम चरणमा पुर्याएको र मन्त्रालयमा बुझाएलगत्तै त्यसका आधारमा आवश्यक कार्यान्वयन प्रक्रिया अघि बढाइने तयारी रहेको स्रोतले जनाएको छ।
