महोत्तरी। महोत्तरीको बर्दिबास नगरपालिका क्षेत्रमा पछिल्ला १३ महिनामा एक सय ४५ जना नयाँ क्षयरोगी पहिचान भएका छन् । यो आँकडा २०८१ साउनदेखि २०८२ साउन मसान्तसम्मको हो ।
नगर स्वास्थ्य शाखाका प्रमुख सुरेश पासवानका अनुसार नगरका १४ वडामध्ये वडा नं ८ सबैभन्दा बढी प्रभावित भएको छ । हातीलेट बस्तीमा मात्रै २२ जना नयाँ रोगी फेला परेका छन् ।
हालै वडा नं ७ र ११ मा तीन जनाको क्षयरोगका कारण मृत्यु भएपछि नगरपालिकाले सघन जाँच अभियान सुरु गरेको हो । यसअन्तर्गत बर्दिबास–८ मा आयोजित शिविरमा एक सय २३ जनाको खकार तथा रगत परीक्षण गरिँदा २८ जनामा सङ्क्रमण भएको हुनसक्ने देखिएको छ । ती सबैको नमुना थप जाँचका लागि गौशाला प्राथमिक स्वास्थ्य केन्द्र पठाइएको छ ।
स्वास्थ्यकर्मीका अनुसार हातीलेटमा मदिरा सेवन, पौष्टिक आहारको कमी र स्वास्थ्य सचेतनाको अभावका कारण रोगी बढेका हुन् । क्षयरोगी समयमै पहिचान भएपछि उपचार सजिलो हुने भए पनि नयाँ सङ्ख्या बढ्नु सरकारको क्षयरोगमुक्त नेपाल बनाउने लक्ष्यका लागि चुनौती भएको उनीहरूको भनाइ छ ।
