काठमाडौं । जेठ १५ गते काठमाडौंमा राष्ट्रिय प्रजातन्त्र पार्टी (राप्रपा) र अन्य राजावादी समूहहरूले आयोजना गर्न लागेको प्रदर्शनमा दुर्गा प्रसाईं नेतृत्वको अभियान सहभागी नहुने भएको छ। प्रसाईंको राष्ट्र, राष्ट्रियता, धर्म, संस्कृति र नागरिक बचाउ महाअभियानुले आफ्नो समूहको कुनै संलग्नता नरहेको स्पष्ट पारेको हो।
अभियानका केन्द्रीय सचिव प्रेमदिप लिम्बूले बुधबार विज्ञप्ति जारी गर्दै आन्दोलनप्रति समर्थन नभएको र सहकार्य पनि नगरेको जनाएका छन्। “यो आन्दोलन राप्रपाको नेतृत्वमा भइरहेको जनअन्दोलन भएकाले हाम्रो सहभागिता हुँदैन,” विज्ञप्तिमा उल्लेख गरिएको छ।
साथै, आन्दोलनको क्रममा कुनै अप्रिय घटना भएमा आफ्नो अभियानले त्यसको कुनै पनि जिम्मेवारी नलिने स्पष्ट चेतावनीसमेत दिइएको छ।
राप्रपाले गणतन्त्रविरुद्ध जनमत जागरुक बनाउन प्रदर्शनको आह्वान गरेको छ भने, दुर्गा प्रसाईं समूहले भने यसप्रकारको कार्यक्रमसँग दूरी कायम गर्ने निर्णय गरेको छ। यो निर्णयले राजावादी धारभित्रै आन्तरिक विभाजन देखिएको संकेत गरेको छ।
