पोखरा, ३ चैत । पोखराको दुई स्थानमा शाखा कार्यालय संचालन गरी पाँच हजार पाँच सय बचत कर्ताको ५६ करोड रुपैयाँ लिएर शिव शिखर सहकारीका संचालकहरु तीन महिनादेखि सम्पर्क विहीन भएका छन् । भक्तपुर जिल्लामा मुख्य कार्यालय रहेको उक्त सहकारीले तीन वर्ष अघि पोखराको पस्र्याङ र चाउथेमा शाखा कार्यालय संचालन गरी पोखरामा सर्वसाधारणबाट रकम संकलन गर्दै आएका थियो ।
सहकारीका अध्यक्ष सुशील बानियाँ र प्रमुख कार्यकारी अधिकृत लीलानाथ गौतम तीन महिनादेखि सम्पर्क विहीन भएको जानकारी उक्त सहकारीका व्यवस्थापक रमेश न्यौपानेले दिए । उनीहरु गत फागुन महिनाको १६ गतेदेखि सम्पर्कमा छैनन् व्यवस्थापक न्यौापानेले भने । बचतकर्ताले अध्यक्ष र कार्यकारीको खोजी गर्न भक्तपुरसम्म पुगेपनि फेला पारेका छैनन । पीडित बचतकर्ताले पीडित समिति नै गठनगरी रकम फिर्ता गर्न सम्वन्धित निकायमा उजुरी समेत गरिरहेका छन् ।
पीडित बनेका पोखरेली बचत कर्ताले आफूले राखेको रकम सहकारीले फिर्ता दिनुपर्ने माग राख्दै संचालकलाई खोजिदिन सहकारी रजिष्ट्रारको कार्यालय र प्रहरी प्रशासनलाई गुहारेका छन् । उक्त सहकारीमा पाँच हजार देखि सात करोड रुपैयाँ सम्म रकम वचत गरेको कुरा पीडितहरुले सुनाएका छन् । पीडितहरुले आइतबार पोखराको मालेपाटनमा भेला नै गरी सहकारीमा राखेको रकम फिर्ता पाउनुपर्ने बताउँदै आएका छन् ।
सहकारी रजिष्ट्रारको कार्यालय गण्डकी प्रदेशका सूचना अधिकारी चोलाकान्त वाग्लेले पोखरा लगायत गण्डकी प्रदेशका केही सहकारी समस्याग्रस्त रहेको बताउनुभयो । समस्याग्रस्त सहकारीबाट पीडित बचत कर्ताको रकम फिर्ता गर्न त्यस्ता सहकारीका संचालकलाई निर्देशन दिइएको जानकारी पनि उनले दिए । आफूले शिव शिखरमा बचत गरेको दुई लाख रुपैयाँ झिक्न पटक पटक जाँदा समेत आश्वासन मात्र पाउने गरेको र फागुनबाट संचालक नै सम्पर्क विहीनको खवरले चिन्तित तुल्याएको पोखरा लेकसाइड निवासी सीता ढुंगानाले दुखेसो पोख्नु भयो ।
लेखनाथमा सानो व्यवसाय संचालन गर्दै आएकी लक्ष्मी बास्तोलाले आफूले खाइनखाई संकलन गरेर गरेर छोराछोरी पढाउँन सजिलो हुन्छ भनेर राखेको पैसा एक्कासी सहकारीका संचालक भागेको खबरले छागोबाट खसेजस्तै बनाएको बताइन् । ढुंगाना र लक्षमी मात्र हैनन् पोखरेली पाँच हजार पाँच् सय वचत कर्ताको रकम फिर्ता हुने हो वा हैन भन्ने चिन्ता पीडितहरुमा छ ।
आक्रोसित पीडितहरुले सहकारीका संचालकलाई उपस्थित नगराएसम्म व्यवस्थापकलाई प्रहरी नियन्त्रणमा राख्न समेत माग गरेका छन् । पोखराकै आशा माझी आफूले आधा पेट खाएर जम्मा गरेको एक लाख २० हजार रुपैयाँ पैसा डुब्ने हो की भन्ने चिन्ता छ । छोराछोरीका भर्ना, पुस्तक किन्नु पर्ने अवस्था आएको छ, अब के गर्ने उनले चिन्ता व्यत्त: गरिन् ।
पोखरा–१३ का मेघनाथ दाहालले उक्त सहकारीमा पाँच लाख रुपैयाँ बचत गरेका छन्, उक्त पैसा झिक्न महिनौ धाए तर आश्वासन मात्र पाए, पैसा पाएनन् । जीवनभर लगाएर कमाएको पैसा उठ्ने हो वा हैन। उनी चिन्तित बनेका छन् ।
