काठमाडौं। प्रतिनिधि सभाको चालु दोस्रो अधिवेशनमा शीर्ष राजनीतिक दलका अधिकांश संसदीय दलका नेताको उपस्थिति कमजोर देखिएको छ। संसद् सचिवालयको असार मसान्तसम्मको विवरणअनुसार प्रमुख प्रतिपक्ष नेपाली कांग्रेसका संसदीय दलका नेता भीष्मराज आङ्देम्बेबाहेक अन्य शीर्ष नेताको उपस्थिति अपेक्षाकृत न्यून रहेको छ।
सचिवालयका अनुसार २०८३ असार ३१ गतेसम्म प्रतिनिधि सभाले ३८ दिन काम गर्दै ४१ वटा बैठक सञ्चालन गरेको छ। चैतमा ६, वैशाखमा ४, जेठमा १५ र असारमा १३ दिन बैठक बसेका थिए।
विवरणअनुसार राष्ट्रिय स्वतन्त्र पार्टीका संसदीय दलका नेता तथा प्रधानमन्त्री वालेन्द्र शाह ३८ दिनमध्ये ६ दिन मात्र उपस्थित भएका छन् भने ३२ दिन अनुपस्थित रहेका छन्। रास्वपाका सभापति रवि लामिछाने १८ दिन उपस्थित र २० दिन अनुपस्थित छन्।
नेपाली कांग्रेसका संसदीय दलका नेता भीष्मराज आङ्देम्बेको उपस्थिति शीर्ष नेतामध्ये सबैभन्दा राम्रो देखिएको छ। उनी ३८ दिनमध्ये ३२ दिन उपस्थित र ६ दिन अनुपस्थित रहेका छन्।
प्रतिपक्ष दल नेकपा (एमाले) का संसदीय दलका नेता रामबहादुर थापा २१ दिन उपस्थित र १७ दिन अनुपस्थित रहेका छन्। त्यस्तै नेपाली कम्युनिस्ट पार्टी (नेकपा) का संसदीय दलका नेता पुष्पकमल दाहाल ‘प्रचण्ड’ शीर्ष नेतामध्ये सबैभन्दा कम उपस्थित देखिएका छन्। उनी ३८ दिनमध्ये ५ दिन मात्र उपस्थित र ३३ दिन अनुपस्थित रहेका छन्।
राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाही र श्रम संस्कृति पार्टीका संसदीय दलका नेता हर्कराज राई दुवै २२ दिन उपस्थित र १६ दिन अनुपस्थित रहेका छन्।
यद्यपि, संसदीय दलका प्रमुख सचेतक र सचेतकहरूको उपस्थिति भने अधिकांश दलमा सन्तोषजनक देखिएको संसद् सचिवालयको विवरणमा उल्लेख छ।
यसैबीच, प्रतिनिधि सभाको चालु अधिवेशनमा ६ सांसदको उपस्थिति शतप्रतिशत रहेको छ। रास्वपाका गोविन्द पन्थी, सुनील केसी र रत्नाकुमारी थापा, नेपाली कांग्रेसका नरेन्द्रकुमार केरुङ र भरतबहादुर खड्का तथा नेपाली कम्युनिस्ट पार्टीकी निराशा चौधरी सबै ३८ दिन उपस्थित रहेका छन्।
