नेपालको पर्वतारोहण तथा पदयात्रा क्षेत्रमा भएको नक्कली उद्धार प्रकरणमा संलग्न एक अस्पतालका सञ्चालकलाई नेपाल प्रहरीले पक्राउ गरेको छ।
केन्द्रीय अनुसन्धान ब्यूरोले उच्च हिमाली क्षेत्रमा पदयात्रा गर्ने विदेशी पर्यटकको उद्धार गरिएको झुटो विवरण तयार पारेर बीमा रकम दाबी गरी गैरकानुनी रूपमा आर्थिक लाभ लिएको आरोपमा लाजिम्पाटस्थित श्रीधी अन्तर्राष्ट्रिय अस्पताल निजी लिमिटेडका सञ्चालक डा. गिर्वाणराज तिमिल्सिना (४४) लाई पक्राउ गरेको हो।
प्रहरीका अनुसार विभिन्न उद्धार उडान सञ्चालन गर्ने कम्पनीहरूसँग मिलेमतो गरी यात्रु तथा सामान विवरणपत्र, उद्धार खर्चका बिल, अस्पताल भर्ना तथा डिस्चार्ज विवरण र स्वास्थ्य प्रतिवेदनहरू किर्ते बनाइ विदेशी पर्यटकको बीमा रकम असुल गरिएको पाइएको छ।
उक्त प्रकरणका कारण अन्तर्राष्ट्रिय सञ्चार माध्यममा ‘विश्वकै छानामा भएको ठग’ जस्ता शिर्षकमा समाचार प्रकाशित भई नेपालको पर्यटन छवि, राष्ट्रिय स्वाभिमान र प्रतिष्ठामा गम्भीर क्षति पुगेको प्रहरीको ठहर छ।
मुलुकी अपराध संहिता २०७४ को दफा ५१ अनुसार राष्ट्रहित प्रतिकूल काम गरेको अभियोगमा काठमाडौं जिल्ला अदालतको अनुमति लिई मिति २०८२ साल माघ २५ गते उनलाई पक्राउ गरी थप अनुसन्धान भइरहेको केन्द्रीय अनुसन्धान ब्यूरोले जनाएको छ।
प्रहरी वरिष्ठ उपरीक्षक तथा प्रवक्ता शिवकुमार श्रेष्ठका अनुसार यस प्रकरणमा अन्य संलग्न व्यक्ति तथा संस्थामाथि पनि अनुसन्धान जारी रहेको छ।
