काठमाडौं । गैर आवासीय नेपाली संघ (एनआरएनए)मा झण्डै तीन वर्षदेखि जारी विवाद अन्त्य गर्ने सहमति बनेको छ। एनआरएनएको आधिकारिकता दाबी गर्दै आएर विभाजित भएका महेशकुमार श्रेष्ठ समूह र बद्री केसी नेतृत्वको समूहले एकतासहित अघि बढ्ने निर्णय गरेका हुन्।
आगामी आइतबार प्रधानमन्त्री सुशीला कार्कीको विशेष उपस्थितिमा औपचारिक रूपमा एकता घोषणा गर्ने तयारी छ। उक्त घोषणाका लागि विदेशमा रहेका दुबै पक्षका पदाधिकारीहरू काठमाडौँ आइपुगिसकेका छन्।
दुवै पक्षबीच हस्ताक्षरित १० बुँदे सहमति अनुसार १२औँ एकता महाधिवेशन आगामी अप्रिल १७ भित्र सम्पन्न गर्ने उल्लेख छ। साथै, सन् २०२३ अक्टोबर १७–२० मा सम्पन्न ११औँ महाधिवेशनबाट निर्वाचित बद्री केसी नेतृत्वको कार्यसमितिलाई मान्यता दिने र पूर्वअध्यक्ष शेष घलेको संयोजकत्वमा २०२५ मे ३–४ मा सम्पन्न एकता महाधिवेशनबाट निर्वाचित महेशकुमार श्रेष्ठ नेतृत्वको कार्यसमितिलाई समेत स्वीकार गर्ने सहमति छ।
यस सहमतिसँगै लामो समयदेखि चल्दै आएको संस्थागत विवाद औपचारिक रूपमा अन्त्य हुने अपेक्षा गरिएको छ।
