चितवन। भरतपुर महानगरपालिका क्षेत्रमा भइरहेको भूमिगत विद्युतीकरण परियोजनाको ८० प्रतिशत काम सम्पन्न भएको छ। आगामी माघसम्म सम्पूर्ण काम सक्ने लक्ष्यसहित पोखरा–भरतपुर वितरण प्रणाली सुदृढीकरण आयोजनाले छ लेन सडक र बाइपास सडक क्षेत्रमा विद्युतीकरण कार्य भइरहेकाे जनाएको छ।
आयोजना प्रमुख इञ्जिनियर आनन्द सुवेदीका अनुसार केही स्थानमा परीक्षण प्रसारणका रूपमा भूमिगत लाइनबाट विद्युत् प्रवाह सुरु भइसकेको छ। हालसम्म करिब ४० प्रतिशत क्षेत्रमा भूमिगत लाइनमार्फत नियमित रूपमा विद्युत् आपूर्ति भइरहेको छ।
सुवेदीले भने, “पुस अन्त्य वा माघ दोस्रो सातासम्म सम्पूर्ण काम सक्ने गरी अघि बढेका छौँ।” उनका अनुसार केबल बिछ्याउने, ट्रमिनेसन जडान, घरघरमा सर्भिस केबल बिछ्याउने तथा ट्रान्सफर्मर पोस्ट निर्माणजस्ता काम तीव्र रूपमा चलिरहेका छन्।
विद्युत् प्रवाह भूमिगतबाट सुरु भए पनि सडकमाथिका पुराना तार केही समयका लागि नहटाइने प्राधिकरणले जनाएको छ। गर्मीमा लोड व्यवस्थापन कति प्रभावकारी हुन्छ भन्ने मूल्यांकनपछि मात्र ती तार हटाइनेछ।
पहिले केन्द्रीय बस टर्मिनलदेखि गोन्द्राङसम्म ३३ केभिए लाइन मात्रै भूमिगत गर्ने योजना भए पनि अहिले ११ केभिए तथा ४०० भोल्टका लाइनसमेत भूमिगत गरिने भएको छ। पछिल्लो सम्झौता अनुसार मुख्य सहरी क्षेत्र तथा चनौली लाइन जडानका क्षेत्रमा काम विस्तार गरिएको छ।
भरतपुरमा भूमिगत विद्युतीकरणका लागि कुल लागत रु १ अर्ब ४० करोड पुग्ने अनुमान छ। सुरुमा विनियोजित रु १ अर्ब ३० करोडमा काम थपिँदै जाँदा रु १० करोड अतिरिक्त आवश्यक परेको हो।
भारतको टाटा प्रोजेक्ट्स लिमिटेड ले सन् २०२१ अक्टोबरदेखि ठेक्का लिएर काम थालिएको हो। प्रारम्भिक म्याद २०२४ जनवरी २० सम्मको भए पनि पटक–पटक म्याद थपिँदै अहिले सन् २०२६ जुलाईसम्म लम्ब्याइएको छ। परियोजना एसियाली विकास बैंक (ADB) को सहयोगमा अघि बढाइएको हो।
