काठमाडौं — भारत सरकारको आर्थिक सहयोगमा प्यूठानको ऐरावती गाउँपालिका–१, अमिलीस्थित श्री दाङवाङ माध्यमिक विद्यालयमा निर्माण गरिएको विद्यालय तथा छात्रावास भवनको आज औपचारिक रूपमा उद्घाटन गरिएको छ। उद्घाटन समारोह भारतीय राजदूतावास, काठमाडौंकी काउन्सलर गीतांजलि ब्रैंडन र ऐरावती गाउँपालिकाका अध्यक्ष नविल विक्रम शाहले संयुक्त रूपमा सम्पन्न गर्नुभयो। उद्घाटन कार्यक्रममा राजनीतिक प्रतिनिधि, सरकारी अधिकारी, स्थानीय समुदायका सदस्य, विद्यालयका शिक्षक–शिक्षिका, विद्यार्थी तथा अभिभावकहरूको उपस्थिति थियो।
उच्च प्रभाव सामुदायिक विकास परियोजनाअन्तर्गत निर्माण
भारत सरकारको अनुदानमा सम्पन्न यो परियोजना उच्च प्रभाव सामुदायिक विकास परियोजना (HICDP) को हिस्सा हो। विद्यालय भवन, छात्रावास तथा आवश्यक सम्बन्धित पूर्वाधार निर्माण कार्य ऐरावती गाउँपालिका मार्फत कार्यान्वयन गरिएको थियो।
गुणस्तरीय शिक्षामा सहयोग
श्री दाङवाङ माध्यमिक विद्यालय प्यूठानको ग्रामीण क्षेत्रमा अवस्थित प्रमुख सरकारी विद्यालयहरूमध्ये एक हो। विद्यालयमा २३४ विद्यार्थी अध्ययनरत छन्, जसमध्ये करिब ६० प्रतिशत छात्रा छन्। विद्यालय र छात्रावासका नयाँ संरचनाले विद्यार्थीहरूको सिकाइ वातावरण सुधार हुने, पहुँच बढ्ने र गुणस्तरीय शिक्षामा नयाँ आधार प्रदान गर्ने अपेक्षा गरिएको छ।
ऐरावती गाउँपालिकाका अध्यक्ष, विद्यालय व्यवस्थापन समिति तथा अन्य सरोकारवालाहरूले भारत सरकारप्रति धन्यवाद व्यक्त गर्दै परियोजनाबाट निर्माण भएका पूर्वाधारले विद्यालयको समग्र शैक्षिक विकासमा महत्वपूर्ण योगदान पुर्याउने विश्वास व्यक्त गरे।
दुई देशबीचको सहयोगको निरन्तरता
भारत–नेपालबीचको दीर्घकालीन मैत्रीपूर्ण सम्बन्ध र बहुक्षेत्रीय सहयोगलाई बलियो बनाउने उद्देश्यसहित सञ्चालन हुने यस्ता परियोजनाहरूले स्थानीय तहमा प्रत्यक्ष प्रभाव पार्ने विकास कार्यलाई प्रवर्द्धन गर्ने बताइएको छ। भारत सरकारका अनुसार, विकास र समृद्धिका लागि नेपाल सरकारले गरिरहेको प्रयासलाई समर्थन गर्नु भारतको प्राथमिकता रहेको छ
