भद्रपुर (झापा)। झापास्थित काँकडभिट्टा नाकाबाट आर्थिक वर्ष २०८१/८२ मा झन्डै रु ४७ अर्ब ६० करोड बराबरको वस्तु तथा सामान आयात गरिएको छ। यो अघिल्लो वर्षको तुलनामा झण्डै रु २ अर्ब ९३ करोड बढी हो।
मेची भन्सार कार्यालयका सूचना अधिकारी एवं भन्सार अधिकृत ईश्वरकुमार हुमागाईंका अनुसार, सबैभन्दा धेरै आयात हुने वस्तुमा पेट्रोलियम पदार्थ अग्रस्थानमा रहेको छ। गत वर्ष मात्रै रु १९ अर्ब ९४ करोड बराबरको पेट्रोलियम पदार्थ आयात गरिएको छ। त्यसपछि रु ४ अर्ब ४५ करोड बराबरका जुट तथा जुटजन्य सामग्री आयात भएका छन्।
उहाँका अनुसार, आयातमा ६.५८ प्रतिशतको वृद्धि भएको छ भने निर्यातमा पनि २.९६ प्रतिशतले वृद्धि देखिएको छ।
२०७९/८० मा रु २४ अर्ब ४१ करोडको वस्तु निर्यात गरिएकोमा २०८०/८१ मा बढेर रु २५ अर्ब १३ करोड पुगेको छ। काँकडभिट्टा नाकाबाट निर्यात हुने मुख्य वस्तुहरूमा अलैँची, चिया, फलामे पाता, छुर्पी, प्लाइउड, अम्रिसो, मोलासिस र भेनिउर सिट पर्छन्।
