टीकापुर (कैलाली)। जानकी गाउँपालिका–४ मुनुवास्थित मुनुवा बिजवृद्धि कृषि सहकारी संस्थाले यस वर्ष सय हेक्टरमा धानको बीउखेती गरेको छ। करिब दुई दशकअघिदेखि बीउ उत्पादन गर्दै आएको सहकारीमा वडा नं ४ र ७ का करिब सय बढी किसान आबद्ध छन्।
गत वर्ष सहकारीले तीन हजार ५०० क्विन्टल धान, तीन हजार क्विन्टल गहुँ, ६० क्विन्टल तोरी र १२ क्विन्टल मकैको बीउ किसानबाट खरिद गरेको थियो। किसानलाई बजार मूल्यभन्दा प्रतिक्विन्टल तीन सय रुपैयाँ बढी मूल्य दिँदै सहकारीले उत्पादनमा हौसला प्रदान गरेको छ।
सहकारीका पूर्वअध्यक्ष कमलबहादुर कठरियाका अनुसार सुरुमा ४५ जना किसानबाट सुरु गरिएको सहकारीले पछिल्लो समय उत्पादनमा उल्लेखनीय वृद्धि गरेको छ। यहाँ उत्पादन भएको बीउ कैलालीलगायत बर्दिया, बाँके, सुर्खेत, दाङ, कञ्चनपुर, दैलेख, सर्लाही, सप्तरी र सिरहामा समेत बिक्री हुने गरेको छ।
रानी जमरा कुलरिया सिँचाइ आयोजनाको सहयोगपछि ग्रेडिङ र भण्डारणको समस्या नरहेको सहकारीले जनाएको छ। हाल सहकारीसँग ६०८ मेट्रिक टन क्षमताको गोदाम रहेको व्यवस्थापक गोविन्दराज रावतले जानकारी दिए।
सहकारीमार्फत धान, गहुँ, मकै, मसुरो, तोरी र मासलगायत बालीका बीउ उत्पादन हुँदै आएको छ। किसान लविता कठरियाले तीन बिघा जमिनमा धान र गहुँको बीउ उत्पादन गर्दै आउनुभएको बताउँदै, सहकारीले मल र बीउ उपलब्ध गराउनुका साथै उत्पादन खरिद गर्ने भएकाले किसानलाई प्रोत्साहन मिलेको बताए।
सहकारीको सदस्य बन्न बीउ उत्पादन गर्ने किसान हुनुपर्ने व्यवस्था छ। हाल सहकारीमा १०९ जना सेयर सदस्य छन्।
सिँचाइ आयोजना कृषि कार्यक्रम कार्यान्वयन एकाइका प्रमुख भरत कँडेलले मुनुवा बिजवृद्धि कृषि सहकारीलाई बीउ उत्पादनमा अग्रणी संस्था बताउँदै आवश्यक प्रविधि र पूर्वाधार सहयोग निरन्तर हुने स्पष्ट पार्नुभयो।
टीकापुर र जानकीका दर्जनबढी सहकारीले अब बीउ उत्पादनमा सक्रियता बढाएका छन्। बीजवृद्धिले देखाएको सफलतापछि अन्य सहकारीहरू पनि बीउ उत्पादनतर्फ आकर्षित हुन थालेका छन्।
