काठमाडौं। नेपालमा ‘नेपाल सवारी साधन प्रदूषण मापदण्ड २०८२’ लागू भएसँगै यूरो-६ मापदण्ड लागू गरिएको छ। वन तथा वातावरण मन्त्रालयले राजपत्रमार्फत नयाँ मापदण्ड सार्वजनिक गरेको हो।
नयाँ मापदण्डअनुसार अब नयाँ आयात हुने साना, मझौला र ठूला यात्रुबाहक तथा मालबाहक चार पाङ्ग्रे सवारीमा यूरो-६ मापदण्ड लागू हुनेछ। दुई र तीन पाङ्ग्रे सवारी तथा हलुका चार पाङ्ग्रेमध्ये ३५० केजीसम्म तौल भएका सवारीमा भने यूरो-५ मापदण्ड लागु हुनेछ।
यसअगाडि २०६९ सालदेखि नेपालमा यूरो-३ मापदण्ड लागू थियो। नयाँ व्यवस्था पुराना सवारी र सन् २०८२ लागू हुनु अघि आयात प्रक्रिया सकिएका सवारीमा लागू नहुने मन्त्रालयले स्पष्ट पारेको छ।
नयाँ मापदण्डअनुसार सवारीको इन्जिनबाट उत्सर्जन हुने कार्बन मोनो अक्साइड, नाइट्रोजन अक्साइड, कण पदार्थ लगायत प्रदूषण तत्वको मात्रामा सिमा तोकिएको छ। अब सवारीको परीक्षण इन्जिन वा च्यासिस डाइनामोमिटरमार्फत हुनेछ।
यससँगै २०६९ सालको मापदण्ड खारेज गरिएको छ।
