पोखरा ।फेवाताल संरक्षणका लागि थालिएको पिल्लर गाड्ने काम स्थानीयको अवरोधका कारण रोकिएको छ। पोखरा महानगरपालिकाका अनुसार अहिलेसम्म १,०५५ मध्ये ९१ वटा पिल्लर मात्रै गाडिएको छ।
महानगर प्रहरी प्रमुख पुरुषोत्तम थापाका अनुसार बाराहीघाटभन्दा माथि नेपाल ट्रस्टको जग्गामा ७ र तल ड्यामसाइडसम्म ८४ पिल्लर गाडिएको छ। तर, निजी जग्गा परेकाले स्थानीयको विरोधका कारण थप पिल्लर गाड्न सकिएको छैन। ‘वार्तामार्फत समाधान गरी काम अघि बढाइनेछ,’ उनले बताए।
सर्वोच्च अदालतको परमादेश अनुसार वर्षायामको उच्चतम जलस्तर ७५४.५५ मिटर निर्धारण गरी त्यस आधारमा पिल्लर गाड्ने काम जेठ १७ गते सुरु गरिएको थियो। गण्डकी प्रदेशका मुख्यमन्त्री सुरेन्द्रराज पाण्डेले पहिलो पिल्लर गाडेर कामको शुभारम्भ गर्नुभएको थियो।
सर्वोच्चको आदेशअनुसार ६५ मिटरभित्रको सम्पूर्ण क्षेत्र फेवातालको जलाधार क्षेत्र मानिनेछ। उक्त क्षेत्र १४,९७० रोपनी ५ आना २ दाम कायम गरिएको छ। सर्वोच्च अदालतले २०३१ पछि दर्ता भएका सम्पूर्ण जग्गा खारेज गर्न र २०३१ अघि दर्ता भएका जग्गालाई मुआब्जा दिन आदेश दिएको छ।
स्थानीयवासीले उचित मुआब्जा नपाएको भन्दै काममा अवरोध गरेका हुन्। उनीहरूले मुख्यमन्त्री र मेयरविरुद्ध नाराबाजी समेत गरेका थिए। पिल्लर गाड्ने काम सर्वोच्चको आदेश कार्यान्वयनका लागि गठित सहजीकरण समितिको निर्देशनमा गरिएको हो।
