काठमाडौँ । स्वीडिस वातावरणीय अभियन्ता ग्रेटा थनबर्ग जहाजबाट गाजाको यात्रामा निस्किएकी छिन् । उनले गाजाका मानिसहरूका लागि औषधि, अन्न, बच्चाहरूको लागि दूध, डायपर र पानी शुद्धीकरण गर्ने सामान बोकेकी छिन् । ‘मेडेलिन’ नामक जहाजमा उनीसँगै १२ जना रहेको बताइएको छ ।
थनबर्ग आफ्नो टोलीसहित जुन १ मा इटालीको सिसिली टापुबाट गाजातर्फ प्रस्थान गरेकी हुन् । यदि कुनै अवरोध भएन भने, मेडेलिन जहाज २००० किलोमिटरको दूरी पार गरेर जुन ७ मा गाजा पुग्नेछ । यो यात्राको उद्देश्य सहयोग प्रदान गर्नु मात्र होइन, इजरायलले गाजामा लगाएको प्रतिबन्धको शान्तिपूर्ण विरोध गर्नु पनि रहेको छ ।
यसैबीच, इजरायलले ग्रेटा थनबर्गको भ्रमणमा कडा अडान लिएको छ । इजरायली सेनाले आवश्यक परे आवश्यक कदम चाल्ने चेतावनी पनि दिएको छ । यद्यपि, ग्रेटा र उनका साथीहरूले यो अभियानलाई पूर्ण रूपमा शान्तिपूर्ण र मानवीय भनेका छन् ।
यात्रामा निस्कनु अघि थनबर्गले एक विज्ञप्ति मार्फत भनेकी थिइन्- ‘यदि मानवतामा कुनै आशा बाँकी छ भने, हामीले प्यालेस्टाइनको लागि आवाज उठाउनु पर्छ । मैले त्यसो गर्दैछु किनभने यो मेरो कर्तव्य हो ।’
