काठमाडौँ। नेपाली सिने उद्योगकी पहिलो महिला सुपरस्टार रेखा थापा करिब साढे दुई दशकपछि आफ्नो अभिनय करियरमा पहिलोपटक रङ्गमञ्चमा डेब्यु गर्दैछिन्। उनी दीपक सिंजाली लिखित तथा सुन्दर धिताल निर्देशित नाटक ‘मीरा’ बाट आज (जेठ १५ गते) कान्तिपुर थिएटर, गैरीधारामा मञ्चित हुँदैछिन्।
सिनेमामा व्यस्तताका कारण यसअघि आएका नाटकका प्रस्ताव अस्वीकार गरेकी थापालाई कान्तिपुर फिल्म एकेडेमी तथा कान्तिपुर थिएटरका सञ्चालक प्रकाश पुरीको पहल र ‘मीरा’ उपन्यासको कथाले यसपटक आकर्षित गरेको हो। “कथा सुनेपछि १५ दिन ‘मीरा’को जीवन एकपटक जिएर हेरौं न भनेर हो। मीरा एउटा सच्चा क्रान्तिकारी हो। ऊ भावुक पनि छ। समाज र परिवारका बन्धनले उसलाई कसरी भित्रभित्र खाइरहेको छ र त्यो कुरालाई ऊ कसरी सामना गर्छे भन्ने कुराले मलाई मञ्चमा ‘मीरा’ हुन मन लाग्यो,” थापाले भनिन्।
थापाका अनुसार ‘मीरा’ नाटकमा प्रेमका विभिन्न प्रकार, जात, समुदाय, आर्थिक वर्ग र पारिवारिक द्वन्द्वको प्रभाव देखाइएको छ। यो नाटकमा दर्शकले सोच्दै आएको प्रेमकथाभन्दा फरक किसिमको कथावस्तु पाउन सक्ने उनको भनाइ छ। उनले आफूलाई विद्रोही अभिनेत्रीका रूपमा हेरिए पनि ‘मीरा’ पात्रजस्तो विद्रोही नभएको स्वीकार गरिन्।
सिनेमा र नाटकको भिन्नता
थापाको एक महिनाको अनुभवले नाटकलाई “बिना एक्सन–कटको फिल्म” को रूपमा परिभाषित गरेको छ। “दुबैमा प्रयोग हुने त अभिनयका नवरस नै हुन्, तर यसमा एक्सन–कट, टेक–रिटेक भन्ने हुन्न। रिहर्सल पढाइ हो भने मञ्चन त्यसको परीक्षा जहाँ उत्कृष्ट हुनु जरुरी छ, जस्ट पास भन्ने नै हुँदैन,” उनले भनिन्। नाटकमा दर्शकसँग प्रत्यक्ष जोडिनु पर्ने, पात्रमा सजीव हुनुपर्ने, सम्पादनको सुविधा नहुने र ठूलो स्वरमा बोल्नुपर्नेलगायतका फरक अनुभव भएको उनले बताइन्।
उनले यो एक महिनाको अवधिले आफूलाई ‘हिरो’ फिल्मबाट डेब्यु हुनुअघिको तयारीका दिनहरू सम्झाएको बताइन्। “जीवनमा म दोस्रोपटक यसरी अभ्यास गरिरहेकी छु। ‘हिरो’ फिल्ममा डेब्यु हुने भएपछि १६ वर्षकी रेखा थापाले नृत्य र अभिनयको प्रशिक्षण लिएको सम्झना मलाई यतिखेर भइरहेको छ,” उनले भनिन्। ‘मीरा’ नाटकमा १७-१८ वर्षकी र ३५-३६ वर्षकी गरी दुई फरक उमेरकी ‘मीरा’ को भूमिका रहेको छ।
भविष्यको योजना
सिनेमाको तुलनामा नाटकमा अझ राम्रोसँग अभिनय गर्न पाइने अनुभव बाँड्दै उनले ‘मीरा’ मा आफ्नो उत्कृष्ट प्रस्तुति रहने विश्वास व्यक्त गरिन्। आगामी दिनमा नाटकमा पुनः मञ्चित हुने-नहुने कुरा आफूलाई आउने प्रस्ताव र समयको उपलब्धतामा भर पर्ने थापाले बताइन्। “मेरा लागि रङ्गमञ्च होस् या सिनेमा, अभिनय उत्तिकै सम्मानित र प्रगाढ भएर बसेको छ। त्यसैले नाटकका लागि भविष्यमा पनि म खुला नै हुनेछु,” उनले भनिन्।
एक महिने नाटकको अनुभवपछि थापाको नजरमा नाटक एउटा साधना र ध्यानजस्तो भएको छ। उनले यो नाटकलाई मञ्चबाट बाहिर लाने सोचमा पनि रहेको र सम्भव भएमा सिनेमा वा सिरिजका रूपमा ल्याउनेबारे निर्देशक सुन्दर धितालसँग कुरा गरिरहेको बताइन्।
कुराकानीका क्रममा निर्देशक सुन्दर धितालले सुरुमा रेखा थापालाई नाटकका लागि प्रस्ताव गर्न हिच्किचाएको भए पनि प्रस्ताव गरिसकेपछि उनलाई पूर्ण रूपमा एक निर्देशकको कलाकारका रूपमा पाएको बताए। नाटक आज जेठ १५ गते (बुधबार) देखि असार ७ गतेसम्म प्रत्येक दिन (बुधबारबाहेक) साँझ ५:३० बजे मञ्चन हुनेछ।
