काठमाडौँ। ऊर्जा, जलस्रोत तथा सिँचाइमन्त्री दीपक खड्काले उद्योगधन्दाहरूलाई पर्याप्त बिजुली दिएको दाबी गरेका छन्। बुधबार पूर्वाधार विकास समितिको बैठकमा बोल्दै मन्त्री खड्काले यो हिउँदमा पर्याप्त बिजुली दिन नसकेको भए पनि मङ्गलबार रातिदेखि उद्योगधन्दालाई पुग्ने गरी बिजुली उपलब्ध गराइएको बताए।
उनले उद्योगलाई बिजुली दिएर पनि करिब डेढ सय मेगावाट बिजुली निर्यात भइरहेको जानकारी दिँदै सांसदहरूलाई यथार्थ सूचना मात्र प्रचार प्रसार गर्न आग्रह गरे। सत्य सूचनाले मात्रै जनता लाभान्वित हुने भन्दै उनले सामाजिक सञ्जालको दुरुपयोग नगर्नसमेत सचेत गराए।
मन्त्री खड्काले भने, “हामीले उद्योगधन्दामा यो हिउँदमा पर्याप्त बिजुली दिन सकिरहेका थिएनौँ। आज रातिबाट उहाँहरूलाई पुग्ने गरी दिएर त्यसबाट पनि उब्रिएको भण्डै डेढ सय मेगावाट अहिले पनि निर्यात भइरहेको छ। यो अवस्था छ। यथार्थपरक रहेर संप्रेषण गर्न सकियो भने जनता लाभान्वित हुन्छन्। सोसल मिडियाको दुरुपयोग पनि भइरहेको छ।”
लोडसेडिङ र भविष्यको योजना
मन्त्री खड्काले बिजुलीको बजार सुनिश्चित भएको बताए। उनले आन्तरिक खपत पनि अबका १० वर्षमा साढे १३ हजार मेगावाट हुने अनुमान रहेको बताए।
उनले लोडसेडिङको हल्ला सामाजिक सञ्जालको हल्ला मात्रै भएको भन्दै बजारमा आएका हल्लाहरू सस्तो लोकप्रियताका लागि आएको बताए। उनले मर्मतसम्भारका लागि बाहेक अन्य कुनै पनि बहानामा लोडसेडिङ नहुने जानकारी दिए।
बेला बखत बिजुली विच्छेद हुने अवस्था आज मात्रै नभई यसअघिका वर्षहरूमा पनि भएको भन्दै उनले गत वर्षमा पनि वर्षमा सात सय घण्टासम्म यसरी विभिन्न पटक बिजुली गएको दाबी गरे। कहिले हावाहुरी, कहिले ठूला ठूला पोल ढलेका कारण, कहिले मान्छे कै कारण पनि बिजुली आपूर्तिमा समस्या भएको उनले उल्लेख गरे। मर्मत गरेको बेलामा विच्छेद हुने बाहेक लोडसेडिङको अवस्था नरहेको र आगामी वर्षहरूमा झनै नहुने दाबी मन्त्री खड्काको छ।
उनले भने, “बजारमा केही चर्चा भएको छ। हामीले यो हिउँदमा १ हजार ५ मेगावाटसम्म बिजुली आयात गर्यौँ। आवश्यकताअनुसार ६ सय, सात सय घट्दै आएर यहाँको बिजुली बढ्दै जाने, आयात घट्दै जाने अवस्थामा छ। अस्तिको दिनसम्म पनि हामी साढे ३ सय मेगावाट बिजुली आयात गरिरहेका थियौँ। तर आजको रेकर्डअनुसार १ सय ५० मेगावाट निर्यात गरेका छौँ। हामीलाई बिजुली पुगेर, उब्रिएर, निर्यात गरेका छौँ। लोडसेडिङको हल्ला यो सामाजिक सञ्जालको हल्ला मात्रै हो।” मन्त्री खड्काले मुलुकको भविष्य बिजुली क्षेत्रमा रहेको बताए।
