काठमाडौँ– चलचित्र ‘पूर्ण बहादुरको सारङ्गी’ हलबाट उतारिने भएको छ । तिहारको अवसर पारेर कार्तिक १५ गतेदेखि प्रदर्शनमा आएको यो फिल्मलाई निर्माण टिमले हलबाट उतार्ने निर्णय गरेको हो ।
नेपालमा सर्वाधिक कमाइ गरेको यो फिल्मले कैयन् रेकर्ड समेत कायम गरेको छ । तर, दक्षिण भारतीय फिल्म ‘पुष्पा २’ रिलिज भएपछि दर्शकको क्रेज हुँदाहुँदै पनि यसको शो मा भारी कटौती गरिएको थियो । सोही कारण निर्माण टिमले फिल्म हलबाट हटाउने निर्णय गरेको हो ।
‘चलचित्र पूर्ण बहादुरको सारङ्गीलाई सिनेमा घरहरुले देखाउनुभएको माया र साथका लागि हामी आभारी छौँ । तपाईँहरुको मयााकै कारण हाम्रो चलचित्रले नेपाली चलचित्र उद्योगमा इतिहास रच्न सफल भयो,’ निर्माण टिमले जारी गरेको विज्ञप्तिमा भनिएको छ ।
पछिल्लो समय भने फिल्म हलले आफ्नो चलचित्रलाई नजरअन्दाज गरेको र रिलिजको पहिलो दिनकै अवस्थामा पुर्याइएको निर्माण टिमको गुनासो छ । स्मरण रहोस्, शुरुमा यो फिल्मलाई उचित शो दिइएको थिएन । तर, पछि फिल्मको व्यापक क्रेज बढ्दा हलवाला शो थप्न बाध्य भएका थिए ।
‘पूर्ण बहादुरको सारङ्गीलाई कर्नरिङ गरेपछि विद्रोह गर्ने अवस्थामा पुग्न बाध्य भएका छौँ,’ विज्ञप्तिमा भनिएको छ ।
निर्माण टिमले यो फिल्मलाई यही मंसिर २४ गते सोमवारदेखि नेपालभर प्रदर्शन नगर्ने बताएको छ ।
विजय बरालको केन्द्रीय भूमिका रहेको यो फिल्मले सिनेमा घरमा आक्रामक व्यापार गरेको थियो । यो फिल्मले नेपाली सिनेमाको इतिहासमा आजसम्मकै सबैभन्दा बढी व्यापार गरेको छ । निर्माण टिमका अनुसार फिल्मले ४५ करोडभन्दा बढीको व्यापार गरेको छ ।
सरोज पौडेलको निर्देशनमा बनेको यो फिल्ममा बाबुछोराको सम्बन्धको कथा देखाइएको छ । फिल्ममा विजयका अलावा, अञ्जना बराइली, प्रकाश सपूत, बुद्धि तामाङ, देशभक्त खनाल, मुकुन ढकाल, माओत्से गुरुङ लगायतका कलाकारको अभिनय रहेको छ ।
हेर्नुहोस् विज्ञप्ति:
