काठमाडौँ– इजरायलले भारतको सेमिकण्डक्टर क्षेत्रमा लगानी गर्ने भएको छ ।
भारतका लागि इजरायलका नयाँ राजदूत रेउभेन अजरले इजरायलले यसबारे छिट्टै घोषणा गर्ने जनाएका हुन् । भारतीय समाचार संस्था एएनआईसँगको कुराकानीका क्रममा राजदूत अजरले यस्तो घोषणाको तयारी भइरहेको जानकारी दिएका छन् ।
अजरले यसबारे विस्तृत विवरण नदिएपनि इजरायलको टावर सेमिकण्डक्टर निजी कम्पनीले भारतमा लगानी गर्ने विषयमा चासो दिएको जनाइएको छ ।
हालै भारतीय प्रधानमन्त्री नरेन्द्र मोदीले आफ्नो मुलुक सेमिकण्डक्टर उद्योगको हब बन्ने दिशामा अघि बढिरहेको बताएका थिए ।
यस उद्देश्यका लागि भारतले अमेरिका, जापान, दक्षिण कोरिया, जर्मनीजस्ता मुलुकसँग सहकार्य गर्न खोजिरहेको छ । राजदूत अजरले सेमिकण्डक्टरसँगै इजरायल भारतसँग पूर्वाधारको क्षेत्रमा पनि सहकार्य गर्न तत्पर रहेको उल्लेख गरेका छन् ।
उनले ३५ अर्ब डलरको लगानीमा तेल अभिभमा नयाँ मेट्रो र नयाँ विमानस्थल निर्माण गर्न गइरहेको भन्दै यसका लागि भारतीय कम्पनीसँग पनि सहकार्य गर्न सकिने उल्लेख गरेका छन् ।
