युक्रेनले रुसले उत्तर कोरियाली सैनिक परिचालन गरेको दाबी गरेको छ। यसअघि ठूलो संख्यामा उत्तर कोरियाली सैनिकले रुसमा तालिम लिइरहेको चर्चा भएको थियो। युक्रेनले हालै सीमावर्ती रुसी सहर कुस्र्क क्षेत्रमा उत्तर कोरियाली सैनिकले गस्ती गरेको पाइएको दाबी गरेको हो।
युक्रेनले आफ्नो जासुसी एजेन्सीले यस्तो भेटाएको बताएको छ। युक्रेनी जासुस एजेन्सीले टेलिग्राममा गरेको एक पोष्टमा रुसको सुदूरपूर्वी क्षेत्रमा तालिम गरी उत्तर कोरियाली सैनिक पश्चिम रुस पुगेको र युक्रेनमा घुसपैठ गर्न लागेको आरोप लगाएको छ। उसले झण्डै १५ हजार उत्तर कोरियाली सैनिक रुसमा रहेको दाबी गरेको छ।
युक्रेनी जासुसी संस्थाले तीन सैनिक जनरल, ५ सय सैन्य अधिकारीसहित १५ हजार उत्तर कोरियाली सैनिक रुसमा परिचालन भएको उल्लेख गरेको छ। तर क्रेमलिनले भने उत्तर कोरियाली सैनिक परिचालनको दाबी खारेज गरेको छ।
ब्रिक्स सम्मेलनका क्रममा रुसी राष्ट्रपति भ्लादिमिर पुटिनले उत्तर कोरियाले तालिमका लागि सैनिक पठाएको स्वीकार गरेका छन्। उनले पत्रकारहरुको प्रश्नमा प्योङयाङ र क्रेमलिन सम्पर्कमा रहेको बताएका छन्।
