काठमाडौं । काठमाडौं महानगरपालिकाले काठमाडौंका बाढीपीडितलाई निःशुल्क खाना र अस्थायी बासको व्यवस्था गरेको छ । काठमाडौंका सम्बन्धित वडाहरुले बाढी पहिरो प्रभावितहरुका लागि खाना र अस्थायी बासस्थानको प्रवन्ध मिलाएका छन् । वडा नम्बर १० का वडाध्यक्ष रामकुमार केसी शनिबार बिहान र बेलुका गरी ९ सय जनालाई खाना खुवाएको बताए । उनका अनुसार अहिले पाँच सय जनालाई खानाको प्रबन्ध मिलाइएको छ । आज बेलुकाबाट खाना खुवाने कार्यक्रम स्थगित हुने भएको छ ।
बागमती नदीले वडा नम्बर १० का शंखमूल, बुद्धनगर, दोभानलगायत क्षेत्रमा प्रभाव र बागमती र विष्णुमतीको दोभान रहेको वडा नम्बर १२ र १४ मा बढी बाढीको प्रभाव परेको महानगरले जनाएको छ । १४ नम्बरका वडाध्यक्ष सुमन श्रेष्ठले बल्खुसँगै कुलेश्वर, फलफूल बजार, खाद्यान्न स्टोर र करखुशी नदी क्षेत्रमा बाढीले सबैभन्दा धेरै प्रभाव पारेको बताए । वडा कार्यालयले हिजो बाढी प्रभावित ११५ जनालाई कम्बल वितरण गरेको उनले जानकारी दिए । त्यस्तै, दिउँसो चार सय जनाका निम्ति पुरी तरकारी र बेलुका खानाको व्यवस्था गरिएको थियो ।
यस्तै, बासका लागि स्थानीय विद्यालयको भवनमा १६ वटा कोठामा कालो म्याट बिछ्याइएको छ । वडा नम्बर ११ का सदस्य सरोज मुल्मीले वंशीघाटका प्रभावितहरुका लागि पसलबाट खाद्यान्न उपलब्ध गराएर क्याटरिङलाई पकाउने जिम्मा दिइएको बताए । सोही वडाकी सदस्य आशा श्रेष्ठले पौरखी बस्तीका प्रभावित छ सय जनाका लागि गुह्येश्वरी स्कुलमा खानपानको व्यवस्था गरिएको जानकारी दिइन् ।
शुक्रबारबाट परेको अविरल वर्षाका कारण राजधानीका नदी किनारा हुँदै बस्तीभित्रै पानी प्रवेश गरेको थियो । यसबाट आइलागेको विपत्तिको सामना गर्न शनिबार बिहानैदेखि महानगर प्रहरी बलका १७ वटा टोली पनि परिचालन गरिएको थियो । टोलीले जनप्रतिनिधि, सुरक्षा निकाय र स्थानीयसँग मिलेर खोज र उद्धारको काम गरेको महानगरले जनाएको छ ।
उक्त कार्यका निम्ति चार वठा रेस्क्यु बोट (डुंगा) को प्रयोग गरिएको थियो । हिजो काठमाडौंका विभिन्न ठाउँमा बाढीमा फसेका एक हजार १६० जनाको उद्दार गरिएको महानगरले जनाएको छ । त्यस्तै, खोलाले बगाएर तथा पहिरोमा परेर ११ जनाको मृत्यु भयो । ७४ वटा पशु चौपायाको क्षति हुँदा एक हजार ३४० वटा घर डुबानमा परेको बताइएको छ । भित्री शहरी क्षेत्रमा पनि पानीको निकास बन्द हुँदा घर, पसल, कबल डुबानमा परेको थियो ।
