पर्वत : गण्डकीमा गत वर्षको बर्खे धानको तुलनामा यस वर्ष करिब चार प्रतिशत कम क्षेत्रफलमा रोपाइँ भएको छ। कृषि विकास निर्देशनालय गण्डकी प्रदेशका महानिर्देशक वासुदेव रेग्मीका अनुसार गत वर्ष प्रदेशका नौ जिल्लामा ९७ हजार ७६९ हेक्टर क्षेत्रफलमा रोपाइँ भएकोमा यो वर्ष ९३ हजार ९२२ हेक्टर क्षेत्रफलमा रोपाइँ भएको छ।
हिमालपारिका दुई जिल्ला मुस्ताङ र मनाङमा धान खेती हुँदैन। बाँकी रहेका नौ जिल्लामा धान खेतीका लागि योग्य क्षेत्रफल चार लाख ७९ हजार छ सय १७ हेक्टर रहेको छ। खेती योग्य सबै जमिनमा धान लगाउने गरिएको छैन। धान उत्पादनयोग्य जमिनमध्ये करिब २० प्रतिशत क्षेत्रफलमा मात्रै कृषकले धान खेती गरेका छन्।
यो वर्ष गोरखामा नौ हजार पाँच सय ६२ हेक्टर, लमजुङमा ११ हजार ८७५ हेक्टर, तनहुँमा सात हजार ६७४ हेक्टर, कास्कीमा १६ हजार ५७, पर्वतमा सात हजार चार सय ५०, स्याङ्जामा १४ हजार २४६, म्याग्दीमा तीन हजार ७४१ हेक्टर, बागलुङमा पाँच हजार ५३६ हेक्टर, नवलपरासी (बर्दघाट सुस्ता पूर्व) मा १७ हजार सात सय हेक्टर क्षेत्रफलमा रोपाइँ भएको छ।
यी जिल्लामा गत वर्ष क्रमशः ११ हजार २६६, नौ हजार ३०१, आठ हजार ५१७, १७ हजार २५३, सात हजार सात सय ८४, १५ हजार ६५, तीन हजार ८८४, पाँच हजार ८८३ र १८ हजार ८१६ हेक्टर क्षेत्रफलमा रोपाइँ भएको थियो। ती जिल्लामा यस वर्ष १० हजार १४०, ११ हजार ८७५, सात हजार ६७४, १६ हजार २२०, सात हजार ५२५, १४ हजार ३९०, तीन हजार ८०६, पाँच हजार ७०७ र १८ हजार ७१६ हेक्टर क्षेत्रफलमा रोपाइँ गर्ने अनुमान गरिएको थियो।
महानिर्देशक रेग्मीले कुलोको समस्याका कारण गोरखाको केही खेतमा तथा नवलपरासी (बर्दघाट सुस्ता पूर्व) मा फाटफुट रोपाइँ बाँकी रहेको भए पनि अघिल्लो वर्षको तुलनामा यस वर्ष भने कक्ष क्षेत्रफलमा रोपाइँ हुने बताए। अहिलेसम्मको तथ्यांकमा करिब चार प्रतिशत कम क्षेत्रफलमा रोपाइँ भएको देखिएको भए पनि त्यसमा केही थपिनसक्ने उनले बताए।
