पूर्वराष्ट्रपति विद्यादेवी भण्डारी के फेरि अब सक्रिय राजनीतिमा आउछिन् त भन्ने विषय अहिले राजनीतिक वृतमा चर्चा र चासोको विषय बन्न पुगेको छ । सोमबार नेकपा एमालेले कम्युनिष्ट पार्टी स्थापना भएको ७५औं वर्ष पुगेको अवसरमा आयोजना गरेको हिरक जयन्तीमा पूर्वराष्ट्रपति विद्यादेवी भण्डारीको उपस्थितिले के अब उनी राजनीतिमा सक्रियता देखाउन चाहेकी हुन् भन्ने प्रश्न उब्जाएको छ ।
कार्यक्रममा उपराष्ट्रपतिको कम्युनिष्टहरुप्रतिको चासो र एकताको विषयले सबैको ध्यान केन्द्रीत गरेको छ । दलीय राजनीतिबाट माथि उठेर दुई कार्यकाल राष्ट्रप्रमुख भइसकेकी भण्डारीले देखाएको अमुख दलप्रतिको चासोले उनको राजनीतिक सक्रियता बारे चर्चा सुरु भएको हो । एमालेकी पूर्वउपाध्यक्ष रहिसकेकी भण्डारीलाई एमालेभित्र कै केही नेताहरुले उनलाई पुनः राजनीतिमा ल्याउन खोजेको देखिन्छ ।
त्यसो त, पार्टीभित्र गुटउपगुट र दुई धार रहेको कुरा एमालेको प्रथम प्रदेश अधिवेशनबाट छताछुल्लै देखिएको छ । त्यतिबेलै एमालेमा भण्डारीलाई ल्याउने कुरा चर्चामा आएको थियो । एमालेभित्रका एकाथरी नेताहरुले अध्यक्ष ओलीको विकल्प खोेजेको राजनीतिका जानकारहरुको भनाइ छ । पूर्वराष्ट्रपति भण्डारीलाई फेरि सक्रिय राजनीतिमा प्रवेश गर्न संवैधानिक हिसाबले बाधक नदेखिएपनि नैतिक रुपमा भने उनलाई अप्ठ्यारो छ । राष्ट्रप्रमुख भएर सात वर्ष मुलुकको अभिभावकत्व ग्रहण गरेको व्यक्ति फेरि कुनै दलीय राजनीतिको दलदलमा पर्न नहुने अधिकांशको बुझाइ छ ।
यद्यपी, उनलाई राजनीतिमा आउन कसैले नरोकेपनि एमाले अध्यक्ष केपी शर्मा ओली भण्डारीलाई एमालेमा प्रवेश गराउन इच्छुक देखिदैनन् । यसअघि नै पनि अध्यक्ष ओलीले पूर्वराष्ट्रपति भण्डारीलाई राजनीतिमा आउनभन्दा राष्ट्रिय सम्मान लिएर बस्न सुझाव दिएका थिए । त्यसैले, सोमबार हिरक महोत्सव पारेर एमालेले भण्डारीलाई दिएको गणतन्त्र गौरव सम्मान कतै भण्डारीलाई सक्रिय राजनीतिमा नआई सम्मान लिएर बस्नुस् भन्ने अध्यक्ष ओलीको चाहना त हाईन भन्ने आशंका समेत उब्जेको छ । यता, एमालेका केही पदाधिकारी तहका नेताहरु समेत भण्डारीलाई राष्ट्रपतिको गरिमा कायमै राख्न र राजनीतिमा नआउन सुझाब दिन्छन् ।
राष्ट्रप्रमुख भइसकेको व्यक्ति सक्रिय राजनीतिमा आएको देखिदैन । पूर्वराष्ट्रपति रामवरण यादवपनि कुनै राजनीतिक दलमा सक्रिय छैनन् । यद्यपी, पूर्वराष्ट्रपति विद्यादेवी भण्डारी भने सक्रिय राजनीतिमा आउछिन् वा आउदिनन् त्यो भने आगामी राजनीतिक घटनाक्रमले देखाउने नै छ ।
