पोखरा – पृथ्वीराजमार्ग अन्तरगत पोखरा–३० को पावरहाउस नजिकैबाट प्रहरीले लागु औषधसहित एक व्यक्तिलाई पक्राउ गरेको छ । प्रहरीद्धारा पक्राउ पर्नेमा धादिङ त्रिपुरासुन्धरी गाउँपालिका–३ स्याथी घरभई हाल पोखरा–१० अम्मरसिंह चोक बस्ने ४० वर्षीय किसन अधिकारी रहेका छन् ।
लेखनाथ स्थित वडा प्रहरी कार्यालय गगनगौंडाबाट खटिएको प्रहरी टोलीले आइतबार साँझ सवारी साधन चेक जाँच गर्ने क्रममा अधिकारीको साथबाट लागु औषध डाईजापाम ५० एम्पुल, फेनेरागन ५० एम्पुल, नुर्फिन ५० एम्पुल र एक थान मोवाइल बरामद गरेको हो ।
जिल्ला प्रहरी कार्यालय कास्कीका प्रवक्ता प्रहरी नायव उपरीक्षक सुन्दर तिवारीका अनुसार अधिकारी विरुद्ध कास्की जिल्ला अदालतमा लागु औषध सम्बन्धी मुद्दा दायरगरी अनुसन्धानका लागि १० दिन म्याद थप गरिएको छ । पक्राउ परेका अधिकारीलाई प्रहरीले बरामद लागुऔषधसहित सोमबार सार्वजनिक गरेको छ ।
