पोखरा । आहा–रारा पोखरा गोल्ड कप फुटवल प्रतियोगितालाई पुनः तेश्रो पटक पोखराको हिमश्री फुडस प्रा.लि.ले साथ दिने भएको छ ।पोखराको सहारा क्लवले आयोजना गर्दै आएको उक्त प्रतियोगितालाई भव्य र सभ्य रुपमा संचालन गर्न आहा–रारा चाउचाउको उत्पादन हिमश्री फुड्सले आहा–रारा पोखरा गोल्ड कप फुटवल प्रतियोगितालाई आगामी १० बर्षको लागि तेश्रो पटक साथ दिने भएको हो ।
क्लवका अध्यक्ष हरिराम गुरुङ (सुरज) र हिमश्री फुड्स प्रा.लि.का अध्यक्ष एवं उद्योगपति स्व.सूर्यबहादुर केसीका धर्मपत्नी प्रेम कुमारी केसी बिच मंगलबार सम्झौता पत्रमा हस्ताक्षर भएको छ । सहारा क्लवलाई मुख्य प्रायोजक हिमश्री फुड्स प्रा.लि.ले बार्षिक रुपमा आगामी पहिलो ३ वर्ष १८ लाख, दोश्रो ३ वर्ष २१ लाख, तेश्रो ३ वर्ष २४ लाख र २०८८ सालमा २७ लाख रुपैयाँ आर्थिक सहयोग गर्ने भएको क्लवले जनाएको छ ।
हिमश्री फुड्सले यस अघि दुई पटकसम्म उक्त प्रतियोगितालाई १०÷१० वर्ष मुख्य प्रायोजकको रुपमा सहयोग गर्दै आएको छ । समाजसेवी उद्योगपति एवं पूर्व सांसद सूर्यबहादुर केसीको बिषेश पहलमा २०५९ सालमा आहा गोल्ड कपबाट १० वर्षे सम्झौता भएको थियो भने २०६९ देखि २०७८ को लागि दोश्रो पटक आहा– रारा गोल्ड कप नामाकरण गरी १० वर्ष करार सम्झौता भएको थियो ।
यस वर्षको २२ औं आहा रारा पोखरा गोल्ड कप पुष १२ देखि २३ गतेसम्म पोखरा रंगशालामा हुने भएको क्लवका महासचिव रामजीप्रसाद अधिकारीले बताए । उक्त प्रतियोगिताबाट बचत हुने रकम सहारा एकेडेमीमा रहेका वालकहरुको भरणपोषणामा खर्चिदै आएको क्लवका बरिष्ठ उपाध्यक्ष केशवराज बरालले बताउनुभयो । हिमश्री फुड्स प्रा.लिका निर्देशक किरण केसीले आफ्ना बाबु सूर्यबहादुर केसीको सपना अनुसार खेलकुद, शिक्षा र स्वास्थ्य क्षेत्रमा लगानीलाई निरन्तरता दिने बताए ।
