प्रेम पुन मगर
सधैँ नास्तिक व्यवहार गर्ने रामबहादुरलाई देखेर राममायाले आश्चार्य मान्दै सोधिन्— “आज सरस्वती देवीको सामु नतमस्तक देख्छु त ! तपाईंलाई के भयो हँ ..?”
“मलाई केही भएको छैन छोरी रिनाको लागि हो ।” उनले भने ।
“ए ! हाम्री छोरीले राम्रोसँग विद्या आर्जन गरुन् भनेर माग्नुभएको हो ?” राममायाले खुशी हुँदै सोधिन् ।
“होइन । त्यो भन्दा पनि महत्वपूर्ण कुरा मागेँ ।” उनको उत्तर आयो ।
राममायाले अड्कल काटिन्— “त्यसोभए राम्रो दुलाहा पाउन् भनेर माग गर्नुभएको होला ?”
“त्यो भन्दा पनि महत्वपूर्ण कुरा मागेको छु ।” उनको जवाफ सुनेपछि राममायाले अझै सोधिन् । “त्यो के कुरा हो ?”
“अरु बोलिरहेको समयमा बिचमै बोल्ने यीनको बानी सुध्रियोस् परमेश्वरी भनेर मागेँ नि !” उनले आफ्नो कुराको बिट मारे ।
