काठमाडौँ । डोनाल्ड ट्रम्पले सन् २०२४ मा पनि राष्ट्रपति पदमा उम्मेदवारी दिने घोषणा गरेका छन् । रिपब्लिकन पार्टीका धेरै नेताहरु उनलाई फेरि राष्ट्रपतिको चुनावमा लडेको हेर्न चाहादैनन् । पार्टीमा ट्रम्पको प्रभावका कारण मध्यावधि चुनावमा सोचे जस्तो नतिजा नआएको उनीहरुको विश्वास छ ।
२०२० को राष्ट्रपति चुनाव हारेपछि सत्तामा रहन खोजेका ट्रम्पलाई २०२४ को निर्वाचनमा उम्मेदवार हुन त्यति सजिलो भने देखिदैन । उनका समर्थकहरुले क्यापिटल हिलमा आक्रमण गरेका थिए । यस विषयमा ट्रम्पविरुद्ध धेरै अनुसन्धान भइरहेको छ । यदि उनी रिपब्लिकन पार्टीबाट राष्ट्रपति चुनावका लागि औपचारिक उम्मेदवार चुनिए भने उनले यी अनुसन्धानबाट बच्ने मौका पाउनेछन् ।
अमेरिकामा, सत्तामा रहेको पार्टीले मध्यावधि चुनावमा अक्सर खराब प्रदर्शन गर्छ । १८६५ मा अमेरिकी गृहयुद्धको अन्त्य पछि, सत्तारूढ दलले यी चुनावहरू मात्र तीन पटक जितेको छ । त्यसैले यसपटक बाइडेनको पार्टीको हार हुने अनुमान गरिएको थियो ।
चुनाव अघि आएका सर्वेक्षणहरूमा मतदाताहरू बाइडेन सरकारसँग विशेष गरी आर्थिक मामिलामा आक्रोशित थिए । हालसम्म चार दशककै उच्च विन्दुमा पुगेको मुद्रास्फीतिबाट उनीहरु चिन्तित देखिएका थिए । अमेरिकामा आर्थिक मन्दी अझै गहिरिने सम्भावना, मुद्रास्फीति घटाउन ब्याजदरमा तीव्र वृद्धि भइरहेको बेला भएको मध्यावती निर्वाचनमा डेमोक्रेटले सोचे भन्दा राम्रो नतिजा ल्याएको छ भने रिपब्लिकनलाई झट्का दिएको छ ।
बाइडेन सरकारले ल्याएका लोकप्रिय नीतिहरू, जस्तै महामारीको समयमा मानिसहरूलाई आर्थिक सहयोग र एक निश्चित हदसम्म विद्यार्थी ऋण माफीले चुनावमा प्रभाव पारेको विश्लेषण भइरहेको छ । अर्कोतर्फ रिपब्लिकन पार्टीले जनतासामु नयाँ विचार प्रस्तुत गर्न सकेन । अहिलेसम्म रिपब्लिकन ट्रम्पवादमा फसेको विश्लेषण निर्वाचनपछि गर्न लागिएको छ । मध्यावधि चुनावमा ट्रम्पका धेरै समर्थकहरू पराजित भएका छन् भने उनका प्रतिद्वन्द्वी रिपब्लिकन र फ्लोरिडाका गभर्नर रोन डिसेन्टिसले यी चुनावमा भारी जित हासिल गरेका छन् ।
रिपब्लिकन पार्टीले मध्यावधि चुनावमा अपेक्षित प्रदर्शन गर्न नसकेपछि रुपर्ट मर्डोकजस्ता ट्रम्पका सहयोगीहरूले पनि उनलाई त्यागेका छन् । मर्डोकका अखबारहरू न्यूयोर्क पोस्ट र वाल स्ट्रीट जर्नल कुनै समय ट्रम्पका समर्थक थिए, तर अब उनीहरू उनको विरुद्धमा परेका छन् । वाल स्ट्रीट जर्नलले नोभेम्बर १० मा एउटा सम्पादकीयमा लेखेको छ, जसमा मध्यावधि चुनावमा रिपब्लिकन पार्टीको कमजोर प्रदर्शनको कारण कमजोर उम्मेद्वारहरू रहेको बताएको छ । मतदातालाई रिझाउनुको सट्टा धेरैजसो ट्रम्पको चम्चागिरीमा व्यस्त रहेको उल्लेख गरिएको छ । अखबारले यो चुनावलाई ट्रम्पको ठुलो हारको रुपमा विश्लेषण गरेको छ । न्युयोर्क पोस्टको पनि ट्रम्पको सम्बन्धमा यस्तै अडान छ ।
ट्रम्पलाई पुनः राष्ट्रपति चुनावको औपचारिक उम्मेदवार बन्ने बाटो सहज नहुने देखिन्छ ।
अब आउदा दिनमा रिपब्लिकनको उम्मेदवारीका लागि ट्रम्पलाई कुन कुन नेताले चुनौती दिन्छन त्यो भने आगामी दिनमा स्पष्ट हुदै जाने छ तर अहिलेसम्म फ्लोरिडाका गभर्नर रोन डिसेन्टिसले ट्रम्पलाई चुनौती दिनसक्ने बताइएको छ ।
