नयाँ दिल्ली— भारतको राजधानी नयाँ दिल्लीमा आयोजना हुने जी–२० शिखर सम्मेलनलाई मध्यनजर गर्दै नर्थन रेलवेले सेप्टेम्बर ८ देखि ११ सम्म अस्थायी रूपमा सेवा स्थगित गरेको एक सूचनाद्वारा जानकारी दिएको छ ।
तालिका अनुसार, सेप्टेम्बर ८ मा १० भन्दा बढी रेल सेवाहरू रद्द गरिएको छ। सेप्टेम्बर १० मा पनि १०० भन्दा बढी यात्रुवाहक रेल सेवा स्थगित गरिएको छ । यी अधिकांश रेलहरू दिल्लीबाट दक्षिण हरियाणाको सोनीपत—पानीपत, रोहतक, रेवारी र पलवल मार्गहरूमा चल्छन्।
यस बाहेक, दिल्ली—रेवारी एक्सप्रेस स्पेशल र रेवाड़ी—दिल्ली एक्सप्रेस स्पेशल रेलहरु सेप्टेम्बर ११ मा पनि स्थगित हुनेछ ।
यसबाहेक, त्यस अवधिमा नयाँ दिल्ली रेलवे स्टेशनबाट प्रस्थान वा आवगमन गर्न तोकिएका धेरै रेलहरू अब गाजियाबाद वा हजरत निजामुद्दीन रेलवे स्टेशनहरूबाट प्रस्थान वा आवगमन हुनेछन्। भारतले सेप्टेम्बर ९ र १० मा नयाँ दिल्लीमा जी—२० शिखर सम्मेलन आयोजना गर्नेछ।
नयाँ दिल्लीमा हुने शिखर सम्मेलनमा सदस्य राष्ट्रहरूका नेताहरू र आमन्त्रित अतिथि देशहरू प्रतिनिधिहरुको वृहत सहभागिता हुने आयोजक राष्ट्र भारतले जनाएको छ ।
जी–२० मा मा अर्जेन्टिना, अष्ट्रेलिया, ब्राजिल, क्यानडा, चीन, फ्रान्स, जर्मनी, भारत, इन्डोनेसिया, इटाली, जापान, दक्षिण कोरिया, मेक्सिको, रुस, साउदी अरेबिया, दक्षिण अफ्रिका, टर्की, अमेरिका, बेलायत र युरोपेली संघ गरी १९ देश रहेका छन् । । भारतले बंगलादेश, इजिप्ट, मौरिसस, नेदरल्यान्ड्स, नाइजेरिया, ओमान, सिंगापुर, स्पेन र युएईलाई अतिथि देशका रूपमा आमन्त्रण गरेको छ ।
