काठमाडौं । चिनियाँ नागरिकहरुले नेपाली भूमीलाई अबैध धन्दा गर्न प्रयोग गर्ने गरेको रहस्य खुलेको छ । सुन तस्करी प्रकरण, अनलाइन ठगी, विदेशी मुद्रा तस्करीलगायतमा चिनियाँ नागरिकहरुको संलग्नता देखिएसँग यस्तो रहस्य खुलेको हो ।
अध्यागन विभागको पछिल्लो चार वर्षको तथ्याङ्क हेर्दा नेपालमा अवैध काममा संलग्न भएको आधारमा ८३७ जना चिनियाँ नागरिक देश निकाला भएका छन् ।
विभागको तथ्याङ्क अनुसार अवैध काममा संलग्न भएपछि सन् २०१९ मा ४२७, २०२० मा २२६, २०२१ मा ३४ र २०२२ मा १५० जना देश निकाला भएका हुन् ।
प्रहरीका अनुसार चिनियाँहरू अनलाइन ठगी, एटिएम ठगी, सुन तथा डलर तस्करी, वन्यजन्तु ओसारपसारलगायत अभियोगमा पक्राउ परेका छन् ।
सात वर्षकोदेखि यताको तथ्याङ्क हेर्दा अपराधमा संलग्न चिनियाँको संख्या १५ सय बढी छ । विशेषगरी उनीहरूले पर्यटन भिसाको दुरूपयोग गर्दै आपराधिक क्रियाकलाप गर्दै आएका छन् ।
यतिमात्र होइन चिनियाँ नागरिकहरू यौन अपराधमा समेत संग्लन हुने गरेका छन् । प्रहरीको केन्द्रीय अनुसन्धान ब्युरोले गत चैतमा सामाजिक सञ्जालमार्फत् नाबालिकामाथि यौन दुर्व्यवहार गरेको आरोपमा चिनियाँ नागरिकालाई पक्राउ गरेपछि यो तथ्यको खुलासा भएको थियो ।
साथै चार वर्षअघि एकैपटक एक सय २२ जना चिनियाँ पक्राउ परेका थिए । माफिया गिरोहले उनीहरूलाई नेपालमा राखेर अवैध अनलाइन गेमिङ र ठगीको काम गरेको प्रहरी अनुसन्धानले देखाएको थियो । भिजिट भिसामा नेपाल आउने र कार्यालय खोलेर गैरकानुनी गतिविधि गरेको प्रहरी अनुसन्धाले देखाउँछ ।
चिनियाँ नागरिक बैंकको सिस्टम ह्याकिङ प्रकरणमा जोडिएपछि प्रहरीले उनीहरूमाथि थप निगरानी बढाएको छ । नेपालमा अन्य व्यवसाय गरेको देखिए पनि चिनियाँहरू भित्रभित्र आपराधिक र अवैध करोबारमा संलग्न हुने गरेको प्रहरी अनुसन्धानले देखाएको छ ।
