काठमाडौं । नेपाली कांग्रेस संसदीय दलको बैठक सोमबार सकिएको छ । तीन दिनदेखि जारी बैठकले सुन प्रकरणको छानबिनका लागि उच्चस्तरीय आयोग बनाउनुपर्ने विपक्षी दलको मागलाई अस्वीकार गरेको छ ।
सिंहदरबारमा सोमबार सम्पन्न कांग्रेस संसदीय दलको बैठकले एक क्विन्टल सुन तस्करी प्रकरणको छानबिन राज्यकै अन्य निकायले गरिरहेकाले उच्चस्तरीय समिति गठन आवश्यक नभएको निष्कर्ष निकालेको हो ।
एमालेले गरिरहेको संसद्को अवरोधलाई कांग्रेसले अनुचित ठहर गरेको छ । एमालेले उच्चस्तरीय समिति गठनको माग गर्दै लगातार संसद् अवरुद्ध गर्दै आएको छ । यसलाई कांग्रेसले एमालेको गैरजिम्मेवारपना भनेको छ । संसद्मा एमालेको अवरोध हटाउन अन्य दलसँग छलफल गर्ने निर्णय कांग्रेसले गरेको छ ।
कांग्रेस दलको बैठकमा केही सांसदले उच्चस्तरीय छानबिन समिति गठन गर्नुपर्ने धारणा राखेका थिए । तर नेपाल प्रहरीको केन्द्रीय अनुसन्धान ब्युरो (सीआईबी) ले ३५ दिनभित्र अनुसन्धान सकेर प्रतिवेदन बुझाउने भनेकाले कांग्रेसले तत्काल उच्चस्तरीय छानबिन समिति गठनको आवश्यकता नदेखेको हो ।
