काठमाडौं। अष्ट्रियाको भियना सहर बस्नका लागि सबैभन्दा योग्य सहरको सूचीको पहिलो नम्बरमा रहेको छ ।
सन् २०२२ मा पनि भियना नै यो सूचीको पहिलो नम्बरमा रहेको भियना पुन दोस्रो पटक लगातार बस्न योग्य शहरको पहिलो नम्बरमा परेको हो । भियना यसअघि सन् २०१८ र २०१९ मा लगातार दुईवर्ष बस्नयोग्य शहरको सूचीको पहिलो नम्बरमा थियो ।
इकोनमिस्ट इन्टेलिजेन्स युनिट ईआईयूले विश्वभर शिक्षा, स्वास्थ्य, संस्कृति, पर्यावरण, स्थिरता लगायतका सूचकका आधारमा बस्न योग्य शहरको सूची सार्वजनिक गर्ने गर्दछ। सूचीको दोस्रो नम्बरमा डेनमार्कको कोपनहेगन, तेस्रोमा अष्ट्रेलियाको मेलबर्न र चौथो नम्बरमा अष्ट्रेलियाकै सिड्नी बस्न योग्य शहर बनेका छन् ।
यसैगरी पाँचौ नम्बरमा क्यानडाको भ्यानकुभर र छैटौँमा स्विट्जरल्याण्डको जुरिच सहर छन् । क्यानडाको क्यालगरी, स्विट्जरल्याण्डको जेनेभा, क्यानडाको टोरन्टो, जापानको ओसाका र न्युजिल्याण्डको अक्ल्यान्ड पनि बस्नयोग्य सहरको सूचीमा उत्कृष्ट दसमा परेका छन् ।
बस्नयोग्य सहरको सबैभन्दा पुछारमा सिरियाको दमास्कस सहर छ । यसैगरी लिबियाको ट्रिपोली, अल्जेरियाको अल्जियर्स, पाकिस्तानको कराँची, पपुवान्युगिनीको पोर्ट मोर्स्बी, बङ्गलादेशको ढाका, जिम्बावेको हरारे, युक्रेनको किभ र क्यामरुनको दुआला पनि पुछारका १० सहरको सूचीमा सूचीकृत छन् ।
