काठमाडौँ । विश्वकपको उपविजेता फ्रान्स टिमको नयाँ कप्तान किलियन एम्बाप्पेलाई बनाएको रिपोर्ट सार्बजनिक भएपछि अर्का खेलाडी एन्टोनी ग्रीजम्यान असन्तुष्ट भएको मिडिया रिपोर्ट बाहिर आएको छ ।
विश्वकपपछि फ्रान्सका तत्कालिन कप्तान गोलकिपर हुगो लोरिसले अन्तर्राष्ट्रिय फुटबलबाट सन्यास लिएपछि फ्रान्सको कप्तान पद खालि रहेको थियो । अहिले युरो कपको छनौट खेल शुरु हुनु अघि प्रशिक्षक डिडीयर डेसच्याम्प्सले युवा खेलाडी एम्बाप्पेलाई कप्तानी सुम्पिएको बताइएको छ । फ्रेन्च मिडिया आउटलेट एल इक्विपले युवा खेलाडी एम्बाप्पेलाई कप्तान बनाएको उल्लेख गर्दै यसबाट सिनियर खेलाडी ग्रीजम्यान असन्तुष्ट भएको उल्लेख गरेको छ ।
पछिल्ला बर्षहरुमा ग्रीजम्यानले फ्रान्सका लागि उत्कृष्ट प्रदर्शन गर्दै आएका थिए र सिनियर खेलाडीहरु लोरिस, राफेल भेरानेले अन्तर्राष्ट्रिय खेलबाट सन्यास लिएपछि उनलाई राष्ट्रिय टिमको कप्तानको स्वाभाविक दाबेदार मानिएको थियो । तर प्रशिक्षक डेसच्याम्प्स भने ग्रीजम्यानको सट्टा युवा खेलाडी एम्बाप्पेलाई विश्वास गर्दै कप्तानको जिम्मेवारी दिएका छन् ।
फ्रान्सका लागि ११७ खेल खेलेर ४२ गोल गरिसकेका ग्रीजम्यानलाई प्रशिक्षक डेसच्याम्प्सका निकै भरपर्दा र विश्वासिला खेलाडीको रुपमा हेरिने गरिन्थ्यो । मिडिया रिपोर्टका अनुसार एम्बाप्पे युवा खेलाडी भएको र अझै कम्तिमा १० बर्ष राष्ट्रिय टिममा खेल्न सक्ने भएकाले दिर्घकालिन रुपमा उनलाई कप्तान बनाएको हुनसक्ने विश्लेषण गरिएको छ ।
यस घटनाले ग्रीजम्यानको अन्तर्राष्ट्रिय खेलमा लामो भविष्य नरहेको संकेत गरेको पनि फ्रेन्च मिडियाहरुले विश्लेषण गरेका छन् । फ्रान्सले युरो छनौट अन्तर्गत अर्को साता नेदरल्याण्डस र रिपब्लिक अफ आयरल्याण्डसँग खेल्ने तालिका रहेको छ ।
