रोगसमस्यामा गनिने गरी दशमा तीन व्यक्ति आजको दिनमा मोटोपनको शिकार छन् । राम्रो र हृष्टपुष्ट देखिने हुनाले कतिपय मोटा व्यक्ति आफू पनि मख्ख पर्छन्, अरुले पनि उसलाई ओहो खाएपिएको मज्जाले लागेछ । भनेर उल्क्याइदिन्छन् । तर, शारीरिक मोटोपन एउटा जघन्य बिमारी हो भन्ने होस समय बितेपछि मात्रै थाहा हुन्छ ।
ब्रिटिस मेडिकल एसोसियसनद्वारा प्रकाशित स्वास्थ्य सम्बन्धी रिपोर्टअनुसार अत्याधुनिक जीवनशैली र तनावजन्य मनोदशाका कारण आज अनेकौँ मनोशारीरिक रोगहरु फैलिरहेका छन् । तीमध्ये मोटोपनको रोग एउटा खतरनाक विकृति हो । जति मानिसहरु हाम्रो जस्तो विकासशील देशमा यो रोगबाट पीडित छन्, त्यसको अनुपातमा तीन गुणा बढी मान्छे विकसित देशमा पीडित छन् । अमेरिका, क्यानडा, जर्मन, अष्ट्रेलियाजस्ता शीर्षस्थ राष्ट्रहरुको हालत यस्तो छ कि उमेर पुगेकाहरुमा त यो समस्या भयावह छँदैछ, सानै उमेरका बालबालिकाहरुमा समेत मोटोपनको महामारी द्रुत गतिमा फैलिरहेको छ ।
विकसित देशमा यो समस्या विशेष गरी फास्फुटड, जङ्कफुड, प्रशोधित खानपानको बाहुल्य र सुखसयलपूर्ण जिन्दगीका कारण बढेको हो । हाम्रो समाजमा पनि यी कारणहरु त लागु हुन्छन् नै, यसमाथि एउटा अर्काे तीतो कारण छ । त्यो हो, मूर्खतापूर्ण खानपान एवम् अतिमांसाहारी प्रवृत्ति । भोजभतेर, जन्ममरण, चाडपर्व, उत्सव र खानेपिउने मोज गर्ने मनोवृत्तिका शिकार भएका हुनाले आज हामीमध्ये समयअगावै कुरुप शरीर र कुरुप भुँडी लिएर हिँड्न विवश छौँ ।
साभारः ‘खाने कसरी पिउने कसरी’ पुस्तकबाट
