काठमाडौं । यो साता नेपालमा अनौठा दृष्य देखिए । काठमाडौंमा यातायात मजदुरले गरेको आन्दोलनकै आवरणमा नयाँ बसपार्क क्षेत्रमा रहेका मोबाइल पसलहरु दिनदहाडै लुटपाट भयो । आन्दोलनकारीहरुले प्रहरीका दुईवटा भ्यान समेत जलाइदिए । यस्तो घटना नेपालका ठुला ठुला राजनीतिक आन्दोलनका समयमा पनि भएका थिएनन् ।
राजनीतिक आन्दोलनका बेला समेत व्यक्तीको सटर फोडेर लुटपाट हुने गरेको थिएन । तर सोमबार यातायात मजदुरले गरेको आन्दोलनमा भने नयाँ शैली देखियो । आन्दोलनकारीले सटर फुटाएर करोडौं मुल्यका मोबाइल चोरेर लगेका छन् । प्रहरीले चोरीमा संलग्न भएको आरोपमा ४ जनालाई पक्राउ समेत गरेको छ ।
मजदुरको आन्दोलन उग्र बनेको भएपनि आन्दोलनको विषय भने सामान्य थियो । बसपार्कमा विरोध सभा गर्न नदिने ल्होत्से सहकारीको निर्णयविरुद्ध शुरु भएको आन्दोलन मोबाइल पसल लुटपाटदेखि प्रहरी गाडीमासम्म आगजनीसम्म पुग्यो ।
मजुदर आन्दोलनको अर्को संयोग पनि थियो । त्यो हो सरकारले दिएको जनयुद्ध दिवसको सार्वजनिक विदा । यसैदिन झापामा भने कुनैबेला माओवादी अध्यक्ष प्रचण्डसँग निकट अहिले एमाले अध्यक्ष केपी शर्मा ओलीसँग निकट रहेका केन्द्रीय सदस्य दुर्गा प्रसाईले गरेको नागरिक सचेतना महाअभियान ।
प्रसाई यस्तो व्यक्ती हुन् जो एमाले अध्यक्ष केपी शर्मा ओलीको सबैभन्दा विश्वाशिला पात्र । उनै प्रसाईले पूर्वराजा ज्ञानेन्द्र शाहसहित पारस शाहलाई अतिथि बनाएर झापामा कार्यक्रम गरे । जुन कार्यक्रममा एमाले अध्यक्ष केपी शर्मा ओली समेत सहभागी हुने बताइएको थियो । झापामै रहेका ओली कार्यक्रममा सहभागी नभएपनि ओलीकै चाहनाअनुसार प्रसाईले कार्यक्रम गरेको दाबी गरिएको छ ।
देखिदा काठमाडौं र झापामा बेग्लाबेग्लै घटना भएपनि यसले नेपाली समाजमा असन्तुष्टिको विउ रोपिएको विषयमा दुईमत छैन । जुन कुनैपनि बेला विस्फोट हुनसक्ने देखिएको छ ।
