काठमाडौं । नबिल बैंक लिमिटेड बैंकिङ क्षेत्रबाट सर्वाधिक आयकर तिर्ने बैंकका रूपमा नवौँ पटक सम्मानित भएको छ। आर्थिक वर्ष २०८१/८२ मा सबैभन्दा बढी आयकर बुझाएको भन्दै नेपाल सरकारले बैंकलाई राष्ट्रिय कर दिवसका अवसरमा सम्मान गरेको हो।
मंगलबार आन्तरिक राजस्व विभागले आयोजना गरेको कार्यक्रममा अर्थमन्त्री डा. स्वर्णिम वाग्लेले बैंकलाई सम्मानपत्र प्रदान गरे। बैंकका तर्फबाट सञ्चालक समितिका अध्यक्ष निर्वाण कुमार चौधरीले सम्मान ग्रहण गरेका थिए।
नबिल बैंकले आर्थिक वर्ष २०८१/८२ मा करिब ३ अर्ब रुपैयाँ आयकर बुझाएको थियो। त्यस्तै, आर्थिक वर्ष २०८२/८३ मा बैंकले ३ अर्ब ६० करोड रुपैयाँ आयकर सरकारलाई बुझाएको जनाएको छ।
सम्मान ग्रहणपछि चौधरीले यो उपलब्धि बैंकका कर्मचारीको योगदान र ग्राहकले देखाएको विश्वासको प्रतिफल भएको बताए। उनले करदाताका रूपमा आफ्नो जिम्मेवारीलाई गम्भीरतापूर्वक लिँदै उत्कृष्ट सेवा, जिम्मेवार व्यावसायिक अभ्यास र नेपालको आर्थिक प्रगतिमा योगदान पुर्याउन बैंक प्रतिबद्ध रहेको उल्लेख गरे।
चार दशकभन्दा लामो बैंकिङ यात्रा पूरा गरेको नबिलले डिजिटल सेवा र प्रविधिको विस्तारलाई प्राथमिकता दिँदै आएको छ। बैंकले डिजिटल बैंकिङ सेवा विस्तारका लागि एनबैंक सञ्चालनमा ल्याएको छ।
बैंकका अनुसार हाल देशभर २६१ शाखा, १७ विस्तारित काउन्टर र ३१८ एटीएममार्फत करिब ३० लाख ग्राहकलाई सेवा दिइरहेको छ।
नेपाल सरकारले हरेक वर्ष राष्ट्रिय कर दिवसका अवसरमा विभिन्न क्षेत्रबाट सर्वाधिक राजस्व योगदान गर्ने करदाता तथा संस्थालाई सम्मान गर्दै आएको छ।




















