काठमाडौँ– चालु आर्थिक वर्ष २०७९/०८० को ६ महिनामा थप १८१ मेगावाट बिजुली उत्पादन भई राष्ट्रिय प्रणाली (ग्रिड) मा जोडिएको छ ।
अर्थ मन्त्रालयले सार्वजनिक गरेको चालु आवको अर्धवार्षिक समीक्षाअनुसार साउनदेखि पुस मसान्तसम्म सो बराबरको बिजुली उत्पादन भएको हो ।
योसँगै कुल विद्युत् क्षमता २ हजार ४५१ मेगावाट पुगेको छ । सरकारी स्वामित्वको नेपाल विद्युत् प्राधिकरण, सहायक कम्पनी र निजी क्षेत्रले बिजुली उत्पादन गरिरहेका छन् ।
निजी क्षेत्रले हालसम्म १७०० मेगावाट बिजुली उत्पादन गरेको दाबी गरेको छ भने बाँकी बिजुली विद्युत् प्राधिकरण र त्यसका सहायक कम्पनीले बिजुली उत्पादन गरेका हुन् ।
त्यस्तै, ६ महिनाको अवधिमा ६६ केभीभन्दा बढीको प्रसारण लाइन १५२ किलोमिटर र ३३ केभी प्रसारण लाइन १०० किमी विस्तार भएको छ । समीक्षा अवधिमा १ हजार ५८ गिगावाट घन्टा विद्युत् निर्यात भएको छ ।
