रौतहट।रौतहटको गुजरा नगरपालिका–५, लक्ष्मीपुरस्थित एक इँटाभट्टामा अलपत्र परेका ४२ जना भारतीय नागरिकको प्रहरीले उद्धार गरी भारतीय सीमा सुरक्षा बल (एसएसबी)को जिम्मा लगाएको छ।
भारतीय ठेकेदारमार्फत लक्ष्मीपुरस्थित मदिना इँटाभट्टामा काम गर्न आएका १२ पुरुष, ११ महिला, १० बालक र नौ बालिकासहित ४२ जनालाई अलपत्र अवस्थामा उद्धार गरिएको जिल्ला प्रहरी कार्यालय रौतहटका सूचना अधिकारी एवं प्रहरी नायब उपरीक्षक बसन्त गौतमले जानकारी दिए।
इँटाभट्टा सञ्चालक मोहम्मद मुजामिलका अनुसार रासन तथा अन्य खर्च व्यवस्थापन गर्ने भन्दै भारतीय ठेकेदार मोहम्मद नासिरले चार दिनअघि आफूसँग भारु ६ लाख लिएर गएपछि सम्पर्कविहीन भएका थिए। त्यसपछि कामदारहरू अलपत्र परेका थिए।
उत्तर प्रदेशको मुरादाबादबाट आगामी असारसम्म इँटाभट्टामा काम गर्ने गरी आश्रित परिवारसहित उनीहरूलाई ल्याइएको थियो। ठेकेदार एक्कासि सम्पर्कविहीन भएपछि इँटाभट्टा सञ्चालकले प्रहरीलाई खबर गरेका थिए।
प्रहरी नायब उपरीक्षक गौतमले बाहिरबाट कामदार ल्याएर अलपत्र पार्ने भारतीय ठेकेदार नासिरको खोजी भइरहेको र घटनाबारे थप अनुसन्धान जारी रहेको बताए।
